Ibanki BCB yagabiye « Probox » ishirahamwe Kigega rigurisha ibihingurirwa mu Burundi n’urwaruka

Ibirori vyo gushikiriza uyo muduga vyabaye kur’uno wa 14/04/2026 kw’ishami ry’iyo banki riri mu Kamenge, aho vyari vyitabwe n’Ubuyobozi bwa BCB, PAEEJ na Kigega.

Nk’uko yavyibukije, Umuyobozi mukuru wa B.C.B Roger Guy Ghislain Ntwenguye yagize ati « BCB yashatse gutera intege umugambi w’igihugu PAEEJ umaze gushika ku bitari bike mu myaka itanu ukora, harimwo uno mugambi wa Kigega. Tumaze kugendera ikigo Kigega, twasanwe hari vyinshi bakeneye, hanyuma duhitamwo kubafasha ku kijanye no kwiyunguruza. Ino ngendeshwa rero izobafasha gutora ivyahinguwe n’urwaruka ngo bishike aho bidandarizwa na Kigega, yongere ifashe gushikiriza ibidandazwa abakiriya baba basavye vyinshi. »
Kari akaryo keza ko kuyaga na Paeej-Burundi ku bundi buryo BCB S.M yoshigikira urwaruka biciye mu nyigisho, kuburonsa ingurane zitavuna biciye ku ngwati zitagoranye, kubafasha kuronka ibikoresho vyo kugwiza umwimbu.

Pr Désiré Manirakiza, Umuhuzabikorwa ku rwego rw’igihugu wa PAEEJ yakengurukiye BCB, ati « Ni ibanki ya mbere mu Burundi itanze ingabire ku rwaruka biciye muri Kigega », agasaba n’abandi bikorera utwabo gukora batyo.
Yongeye arakeza uburongozi bwa Kigega ko bwakerebutse bukaja kurondera iyo ngabire: « Bari kwiyicarira bakarindira ko PAEEJ ija kubaronderera uburyo, maze bakagura imodokari. Ariko siko bakoze, bikajana n’ihangiro PAEEJ yihaye ko urwaruka rumenya kwitunganiriza imigambi ijanye n’ubutunzi bwarwo ».

Roland Rugero arongoye Kigega akaba yakengurukiye BCB S.M kur’iyo ngabire y’ingendeshwa, « izofasha mu gukura kw’ubutunzi bw’ishirahamwe. »
Akaba yibukije ko amashirahamwe n’amakoperative 305 amaze kwiyandikisha mu bokorana na Kigega, nayo ayarenga ijana akaba ariko aradandariza harya kuri « Palais des Arts ».

Mwomenya ko ishirahamwe Kigega ryashizweho na PAEEJ mu ntango za 2025 kugira ngo haboneke ivyamwa vy’akigoro k’Uburundi mu bijanye no gushigikira urwaruka, hongere hashirwe imbere ibihingurirwa mu Burundi.