Ubwo birashoboka ko umugambi Menyumenyeshe uja mu minwe y’abayobozi b’indero mu mashure?

Isereruka ry’umugambi Menyumenyeshe mu rwaruka ruri mu mashure ryaruhaye kumenya ico ruri, ivyo bituma rwihesha agaciro, abahora bagendera mu ngeso mbi baraziheba, inda z’indaro ziragabanuka, umwanya bahora bata mu bitagira ikimazi bawukamisha ibikorwa vyo kwiteza imbere, mbere bamwe barahava bagira n’umwitwarariko wo kuwukwiragiza ahandi. Ku bw’ivyo vyamwa vyawo, abayobozi b’amashure na bo bagize bati : « Ihibambe, ntukazime tukiriho ».

Kuva kw’igenekerezo rya 11 gushika ku rya 13 Kigarama, mu ntara ya Gitega, ishirahamwe ryishinze guteza imbere umwigeme w’umurundikazi APFB (Association pour la Promotion de la Fille Burundaise) rifashwe mu mugongo na Care International, ryaratunganije uruganda rwakoranije abayobozi b’amashure mu ntara umugambi Menyumenyeshe umaze gushika mwo. Hari mu ntumbero yo kurabira hamwe ibikorwa bimaze kurangurwa n’ubwo buyobozi, n’ukwiga ingengene amashure nyene yowufata mu minwe akawugira uwayo ku buryo n’aho ikiringo cawo cohera, utoca uzimangana.

Muri urwo ruganda harabaye ho ugushingiranira intahe, intara ku ntara aho abayobozi basabikanya ivyo baranguye kubw’umugambi Menyumenyeshe ndetse n’ingaruka vyagize ivyo bituma bungurana ivyiymviro.

Claver Ndikuriyo, Ni umuyobozi w’indero muri komine Muha iri mu gisagara ca Bujumbura. Uwo, amenyesha ko kuva mu mwaka wa 2016 umugambi Menyumenyeshe uhashitse habaye ihinduka rikomeye. Atanga akarorero kw’ishure shingiro Busoro higeze gutwara inda  abana 8 mu mwaka  umwe ariko ubu hakaba habonetse imwe yonyene. Kw’ishure rya Ruziba abigeme ngo wasanga ku mwaka ari nka 4 batwaye inda z’indaro ariko gushika ubu ngo nta n’imwe ikiharangwa.

Obède Bizovugayesu, umuyobozi w’ishure ry’i Remera muri komine ya Mugwi avuga ko n’ibiburiburi abakobwa 3 ku mwaka batwara inda ariko ubu ngo ntibicibonekeza. Ku bw’inyigisho zitangwa muri uwo  mugambi abana b’abigeme ngo basigaye batinyuka bakayaga n’abavyeyi babo ivy’ihindagurika ry’imibiri yabo, ibitari vyoroshe mu myaka irenganye.

Umugambi Menyumenyeshe ufasha urwaruka rurenga 4 700 mu ntara ya Rumonge

Hari ubuhinga bwakoreshejwe mu gutanga inyigisho

Ha mbavu y’abatanga inyigisho biciye mu migwi isanzwe iri ku mashure nk’iyigishanya ivy’irondoka rijanye n’amagara meza, ivy’isuku n’ibindi, hari ukundi kuntu inyigisho z’umugambi Menyumenyeshe zitangwa biciye mu vyese, abandi bakazicisha ndirimbo. Obède Bizovugayesu we amenyesha ko kw’ishure ayoboye hari n’abana basigaye bigisha ivy’uwo mugambi babicishije mu bicapo kandi ivyo bakabikorana umwete ku buryo babishishikaye boshikana ikivi kure.

Kubwa Menyumenyeshe urwaruka rwarajijutse

Obède amenyesha ko kw’ishure ry’i Remera abana b’abigeme batakiboshwe na ya mico ya kera itabemerera kwisanzura ngo bavuge canke bakore  kandi kumbure botejwe imbere n’ugushira ahabona impano ziri muri bo. Aho rero agatanga akarorero k’ukuntu bashoboye kuja hamwe barigishanya ingene bakora udukoresho tubafasha mu bihe vy’ubutinyanka bakaza barasahirizanya bitagoranye. Ubu mbere ngo barugurutse mu mutwe, bararima, bakimbura eka bakaronka n’udufaranga ku buryo bashoboye n’ukwiyubakira inzu bakoranira mwo bahana inyigisho z’ivy’irondoka rijanye n’amagara meza.

Nkunzimana Alice, umuhuzabikorwa mw’ishirahamwe Apfb, yisunze intahe z’abayobozi zivuga ibikorwa bamaze kurangura, akumva ingene ishure rimwe ry’i Muyinga ryashoboye gukwiragiza ivyigwa vy’umugambi Menyumenyeshe mu makomine 6 aho utarashika, ngo afise ivyizigiro vy’uko uzoguma utsimbatazwa no mu gihe ikiringo cawo kizoba caheze. Agahamagarira abayobozi bose guhora bawuhagararira eka no mu manama bakunda kugira bakawugarukako kenshi.

Mwomenya ko abayobozi bari bitavye urwo ruganda bahagurukanye inguvu zidasanzwe aho umwe wese yajanye umuhigo wo kurangura ibikorwa yabuye kuri mugenzi we. Bakaba biyemeje gufata mu minwe umugambi Menyumenyeshe na kare ngo vyaragaragaye ko aho inyigisho zawo zashitse, n’umwimbu w’amanota wiyongereye, bihesha agateka urwaruka ndetse n’abarezi nyene ubwabo.