Akarorero k’abakenyezi barengeye ibibatandukanya

Bose ni abakenyezi bo mw’ishirahamwe Dushirehamwe, bagize umugwi w’intamenwa mu ntumbero yo guteza imbere umukenyezi wo mu Rugazi, kuko umukenyezi wo mu Rugazi ahangana n’ingorane nyinshi. Aha twovuga nk’abahabara, ugucikiza, uguhohoterwa bibera mu ngo no kutagira ijambo ku butunzi bw’umuryango.

Ikinyamakuru Jimbere casanze abo bakenyezi bo mu Rugazi ku biro bikuru vya zoni Mutsinda. Abo bakenyezi bakaba barakurikiranye inyigisho zo gukarihirizwa ubwenge zatunganijwe n’ishirahamwe Dushirehamwe hamwe na REJA mu kwezi kwa kigarama guheze, mu ntumbero yo guhanahana ivyiyumviro ku bijanye n’uburongozi bwiza n’ingingo ngenderwako za bwo, ugutatura amatati bidaciye mu ngimba, ukuvugira abandi hamwe n’ubugabo nyabwo.

Muri abo bakenyezi, harimwo abaserukira  abandi. Kuva mu 1996 , Ntakiyica w’imyaka 60,  ni imboneza ibushitse , uwigisha abandi, imboneza mu guharanira amahoro, mu kunywanisha no mu kwigisha abandi umubano mwiza kuva inyuma y’aho amakuba  yibonekereje muri komine ya Rugazi. Mélanie Nzeyimana na we, ni umwigisha w’umukukuruke. Amaze imyaka ibiri ari ijisho mw’ishirahamwe Dushirehamwe muri komine Rugazi. Abo bapfasoni, nta co batabonye. Barakoze uko bashoboye kwose kugira bateze imbere aho babaye. Floride Ntakiyica yabaye ijisho ry’ishirahamwe Dushirehamwe kuva 1996, ni ukuvuga inyuma gato y’aho iryo shirahamwe rishingiwe. Muri ico gihe umunezero wari nk’umugani. Nta nzu n’imwe y’i Muzinda itabomowe. Intambara yarabiciye biracika i Bubanza. Ntakiyica n’abandi bagenzi biwe icenda, baciye bishiriraho umugambi uhambaye, umugambi wo kwegeraniriza hamwe abakenyezi bose basanzajwe n’intambara, bagashirwa hamwe mu makambi y’impunzi bivanye n’ubwoko baturukamwo. Nkuko Floride abishingira intahe, agira ati: «Turi abakenyezi 10 gusa, vyaratugoye kubegeranya bose. Twaciye turondera abakenyezi boshobora gushikira vyoroshe izo mpunzi kandi dukoresheje uburyo bwiza bwo kubiyegereza, umugambi wacu warashobotse».

Igikorwa c’izo mboneza caragize akamaro kanini cane. Abakenyezi baciye batangura kwishira hamwe mu ntumbero yo gusenyera ku mugozi umwe kugira bashobore kugwiza umwimbu. «Mubutandukane bwacu, twese duhanzwe n’umwansi umwe, inzara. Umuhutu canke umututsi, dutegerezwa twese guhangana n’uwo mwansi. Inzara, ni yo yabaye intango y’ikiyago, ivyakurikiye vyaratworoheye kuko twari twamaze kuja hamwe», ivyo Melanie yibuka.

Uko haza uruganwe rushasha, ni ko intambamyi ziyongera.

Intambara nta kibanza igifise, ariko abakenyezi bo mu Rugazi ntibosinzira umukondorazosi ngo baratsinze Rurayi. Urugamba imboneza zari zifise ntirwarangiye, gusa rwafashe iyindi ntumbero. Igiterwa c’umuceri hamwe n’ikigazi n’ivyo bikorwa nyamukuru bitanga umwimbu mwiza. Ariko ikibabaje ni uko abakenyezi babirima atari bo babirya, kuko iyo bahejeje kwimbura baca babikurwamwo n’abahabara n’ukurenga ibigo kw’abanega babo.

Mu ntumbero yo kurwanya ako kabi kabishe, Melanie asaba ko abakenyezi bose bokwijukira kuja mu mashirahamwe, ariko bakitwararika guha icubahiro kibereye abagabo babo. Melanie agira ati: «Uguhindura inyifato gutegerezwa guhera kuri twebwe nyene. Twishize hamwe, turigishanya, turafashanya, kandi n’ikibazo turagitorera umuti». Yemeza ko umugambi wo gufata mu mugongo abakenyezi b’imboneza waje hageze, mu gihe urunganwe rushasha, rwo Burundi bw’ejo rwobigiramwo uruhara. Melanie arangiza agira ati: «Harakenewe imboneza zizodusubirira muri kazoza. Kanatsinda, hariho n’ibibazo na twebwe dukuze tudatorera umuti”.