« Hari amajambo menshi ari mu gifaransa gusa umuganga n’umurwayi bikagora gutahurana »

Ivyo vyashikirijwe na muganga Tania Gahama Ineza asanzwe arongoye ishirahamwe Uzima ryitaho amagara y’abantu, hari mu ndwi igira gatatu ya rya sekeza ngarukamwaka Curijambo, aho hariko haracurwa amajambo yifashishwa cane mu gifaransa mu gisata c’amagara y’abantu ariko adafise ukwo yitwa mu Kirundi.

Abakunzi b’ururimi rw’ikirundi bahagarikiwe na Ferdinand Mberamihigo, Umwigisha wa Kaminuza y’Uburundi, Tania Gahama Ineza, umuganga akaba n’umurongozi w’ishirahamwe ryitaho amagara y’abantu « Uzima », Inès Kidasharira, umukenyezi akorera mu gisata c’irondoka rijanye n’amagara meza na Napoléon Ahishakiye, umuryoshakiyago wo mu Ruganda Gusoma, bari bitabiriye iryo sekeza kuri uyu wa 1 Myandagaro 2024 mu ntumbero yo gufasha gucura amajambo afise intumbero, insiguro n’inyubako y’ikirundi bitomoye.

Inès Kidasharira agira ati: « Turakunda kubura amajambo atomora neza akadomako ico tuba dushaka kuvuga. Buri munsi duca twamana ikibazo co kurondera amajambo yegereza insiguro ariko bikarangira n’ubundi tudahuje n’abenegihugu. Amajambo ducura nibayamenyera bizotworohera. »

Abahari bahari bose bahavuye bafise inyota yo kwongera kugaruka gucura ayandi majambo, haba muri ico gisata no mu bindi, kuko babona ko aje kubafasha guhuza ibiyago n’abenegihugu bajejwe gutunganirizwa.

Aya niyo majambo yacuzwe/yibukijwe mu masaha abiri y’ico kiyago:

1. Procédure : ingengabikorwa, ingengangendo
2. Variole du singe: akaryama ka nkende
3. Consultation : isuzuma
4. Urgence : mu batabarizwa
5. Santé sexuelle : amagara ndorabitsina
6. Maternité: iyakiriro
7. Autopsie: isuzuma ry’ikiziga
8. Facteur de risque: impánamizi
9. Infection: ubwandu
10. Chirurgie: isaniro
11. Opération: isanasana
12. Sage-femme: umwakirizi
13. Pédiatrie: aho bavurira abana
14. Pluridisciplinaire: inkoranyabuhinga