Abakenyezi bagera ku 2000 bakora urudandaza rutoruto njabukambibe bagiye gushigikirwa n’ikigo TMEA

Amafaranga arenga 600.000 y’amadorari y’amanyamerika niyo ategekanywa kuzokora mu mugambi wo guteza imbere abakenyezi bakora urudandaza njabukambibe bo mu ntara zine: Cibitoke, Bujumbura, Rumonge, na Makamba, mu kiringo c’imyaka ibiri (2019-2021). Vyaraye bishikirijwe na Christian Nibasumba aserukira mu Burundi ikigo corohereza abakora urudandaza njabukambibe mu Karere ka Afurika y’Ubuseruko, Trademark East Africa (TMEA).

Amashirahamwe abiri: Partner Africa (PA) na Association des Femmes Rapatriées du Burundi (Afrabu) niyo yacaguwe n’ibiro vy’ikigo TMEA mu Burundi gushira mu ngiro uwo mugambi ufise ihangiro ry’ugufata mu mugongo abakenyezi bakora urudandaza rubayabaye bashorera mu bihugu bibanyi (Congo, Rwanda na Tanzania): « Women in Cross Border Trade – Sharing Information ».

Irindi hangiro ry’uwo mugambi akaba ari gushinga ibiro vy’uguhanahana amakuru mu vy’ubudandaji (Bureau d’information commerciale) mu ntara ziri ku mbibe z’igihugu nka Makamba na Rumonge, ndetse hanatezwe imbere bene ivyo biro bisanzwe biri mu Gatumba no ku Ruhwa, hatibagiwe inyigisho zizohabwa abakenyezi mu bijanye n’urudandaza njabukambibe, banafashwe no kurahura ubumenyi babone uko abandi bakora.

Abo bakenyezi biraborohera mu rudandaza bakora?

Intambamyi ni nyinshi kuri abo bakenyezi basanzwe bikorera urudandaza rubayabaye nk’uko babimenyesheje ku muhingamo w’uyu wa 6 Myandagaro, igihe Komite nkuru ijejwe kugenzura ibikorwa vy’ikigo TMEA mu Burundi (National Oversight Commitee) yari iramutse igendera abakenyezi bakora urudandaza rutoruto njabukambibe ku mupaka wa Gatumba-Kavimvira, bahurikiye muri koperative « Tushirikiwote ».

Hakizimana Béatrice, umwe mu bakenyezi bahurikiye muri iyo koperative, agi ati : « Benshi muri twebwe usanga tudandaza utumandarine canke imicungwe. Tukiva mu Burundi ntihabura abo duhura batwaka amafaranga, twajabukira muri congo ho bikaba ibindi. Uwo duhuye wese agenda aradutuza ivyo twikoreye, ngo utazanye aya nturengana, ugasanga rero na ka gatahe kagiriyemwo gutyo tukama mu rushako. »

Blanco Bitakwira, aserukira ibiro vy’uguhanahana amakuru ku bijanye n’urudandaza ku ruhande rwa Congo, nawe nyene avuga ko abo bakenyezi bakora urudandaza rubayabaye batarira busema, kuko ngo ata kuntu na kumwe bokwunguka mu gihe bashitse ku mupaka w’i Burundi basabwa ikarata ya CPGL nshasha, ku wa Congo naho bati zana aya. We ngo arakora uko ashoboye ariko ngo agira aho ageza.

N’igiki coba kirakorwa mu maguru masha?

Clarisse Baricako asanzwe aserukira iyo koperative agasaba ko Reta yoborohereza mu kubaronsa agakarata kabamenyekanisha bita « Jirani mwema » maze bakaza barajabukana ivyo bidandazwa vyabo batarinze kuriha ku rubibe rw’Uburundi na Congo canke naho bakabagabanya amafaranga kuko ngo kwama barishe ibihumbi 18.000 Fbu vy’ikarata ya CPGL buri uko amezi abiri atashe navyo bitaborohera. Bagasaba kandi inzego zibijejwe ko zogiriranira ibiganiro na Reta ya Congo maze baze bararengana batekaniwe.

Abo bakenyezi bo mu Gatumba basanzwe bakora urudandaza njabukambibe bakaba bagendewe na komite nkuru ijejwe kugenzura ibikorwa vy’ikigo TMEA mu Burundi, inyuma y’inama igira iya 30 ihuza iyo komite yari yabereye kw’ihoteri yitiriwe ikiyaga Tanganyika, aho Christian Nibasumba aserukira ico kigo, yari yaramutse yerekana ivyaranguwe muri uwu mwaka urenganye n’ibigiye kurangurwa mu gice gikurikira.

Gutembereza ibicuruzwa mbumbarugo umuhana ku wundi, uburyo bugezweho bwo guca akanoti? Erega iyo vyagenze neza, Kabirori araronka nka 5.000 Fbu y'inyungu ku munsi kubera imyumbati yiwe https://t.co/aBm9DmlNtJ#Burundi #EntrepreneurshipWorldCup pic.twitter.com/R8mcMmZcJN

— Jimbere (@JimbereMag) July 15, 2019