Mw’isizeni y’ikawa ya 2020-2021 habonetse amatoni 73.020,191

Ibikorwa vyo kwegeranya umwimbu w’ikawa hamwe no kuwudadanza vyagenze neza mw’sizeni ya 2020-2021, aho umwimbu wabonetse uri ku rugero rw’ibice 53, 37%. Ivyo vyashikirijwe n’Umushikiranganji w’Uburimyi, Ubworozi n’Ibidukikije Déo Guide Rurema, kuri uwu wa 19 Ndamukiza 2021, aho yariko aramenyesha ibijanye n’ivyaranguwe mw’isizeni y’ikawa y’umwaka wa 2020 -2021 n’ivyo bagiye gukora mw’isizeni ya 2021-2022.

Ku matoni y’ikawa y’ibiturumbwe 136.792 yari yitezwe muri iyi sizeni ya 2020-2021, habonetse iyingana n’amtoni 73.020,191. Ni ukuvuga ibice 53, 37%. Iryo gabanuka r’umwimbu rikaba ahanini ryaturutse kw’ihindagurika ry’ibihe nk’uko bishikirizwa na Déo Guide Rurema, Umushikiranganji w’Uburimyi, Ubworozi n’Ibidukikije.

Uyo mushikiranganji amenyesha ko uwo mwimbu wabonetse, urwego Odeca rwakoreye ku matonorero yahoze akoreshwa n’ama Sogestal hamwe no kw’ikoborero Sodeco Buterere. Rero amatonorero ashika ku 270 yegukira amashirahamwe 57 akaba ariyo yashoboye kwegeranya umwimbu w’ikawa wa 2020-2021. Abarimyi bose bashoye ikawa haba ku matonorero ya Odeca canke y’amakoperative y’abarimyi b’ikawa hamwe n’ay’abikorera utwabo bakaba bararonse agahembo kabo aho ku kiro c’ikawa nziza y’ibiturumbwe baronka 550Fbu, iy’ibisorwa bakaronka 275Fbu ku kiro.

Ikawa ishoka hanze…

Déo Guide Rurema amanyesha ko ikawa ishoka hanze yashoboye kuboneka muri iyi sizeni ya 2020-2021 ingana n’amatoni 15.054. Igikorwa co gushora iyo kawa ngo kiri ku musozo. Uyo mushikiranganji agira ati: «Gushika ku wa 12 Ndamukiza 2021, amatoni 14.646, 590 ni yo amaze kudandazwa ku giciro c’amadorari y’abanyamerika anagana 34.632.696, 44 USD. Ni ukuvuga amafaranga y’amarundi 66.667.536.029 Fbu».

Ku bijanye no kwitegurira isizeni y’ikawa y’umwaka wa 2021-2022, Umushikiranganji w’Ububurimyi, Ubworozi n’Ibidukikije Déo Guide Rurema, amenyesha ko umwimbu witezwe ungana n’amatoni 43.401,828. Muri iyi sizeni nyene hitezwe uwo mwimbu, kabaye n’akaryo keza ku mushikiranganji ko kumenyesha ko ikiro c’ikawa nziza y’ibiturumbwe kizogurwa 700Fbu, iy’ibisorwa ikazogurwa 350Fbu ku kiro.