Yoweri Museveni ati « mfise impamyabushobozi mu kurwanya Covid19 »

Mu gihe yari yiteze gushikiriza ijambo ku baganda, Museveni yandurutse afatwa na Covid19. Nayo abanyakenya bagiye kuzoshora ibidandazwa vyabo i Buraya ata matagisi babanje gusabwa… Ni amwe mu makuru yaranze ibihugu bigize umuryango wa Afrika y’ubuseruko mu ndwi yo kuva ku wa 12 gushika ku wa 19 Ruheshi 2023

Inyuma yo kuja mu kibanza ca wenyene amaze gutorwa umugera wa Covi19 ku wa 7 Ruheshi 2023, Perezida Yoweri Museveni wa Uganda yarandikiye Abanye Uganda abamenyesha ko yatsinze (yakize) iyo ngwara inyuma y’iminsi 11 afashwe.

Mu gwandiko yasohoye ku rubuga rwiwe rwa Twitter kuri uyu wa 19 Ruheshi aho yasohoka ikirimba ca Nakasero yari agwariyemwo ari wenyene, Museveni yarahamagariye Abanya Uganda kwigengesera imbere y’ingwara zitandukanye zishobora kubangamira ubuzima bwabo. Museveni ati vyiza inguvu zoshirwa mu kwikingira hako zija mu kwivuza.

Mwomenya ko Museveni nubwo yafashwe n’umugera wa corona ari mu bakuru b’ibihugu batigeze bijajara imbere yawo. Nubwo OMS iza yarakuye covid19 ku rutonde rw’ingwara ziteye uruhagarara isi, Museveni we yabandanije yambara agafukamunwa aho ari hose ariko aza kugaheba mu minsi iheze kuko kamutera kubabara mu muhogo no mu maso. Ariko naho nyene yabandanije agendera ibwirizwa ryo guhana umwanya n’abandi …

Muri Uganda nyene, nk’uko tubikesha Daily Monitor, ku wa gatanu itarike 16/06/2023, abantu bagera kuri 42 harimwo abanyeshure 37 bo kw’ishure rya Lhubiriha bishwe nabi bamwe baturiwe n’umuhari w’iterabwoba ugwanya Reta wa ADF. Urupfu rwateye amakenga abasanzwe baba mu micungararo y’iryo shure kuko ahatarenga ibirometero bibiri gusa hari abasirikare b’igihugu bahacumbitse kandi n’umutekano ukaba wari wongererejwe muri ako karere.

Amasezerano y’ubudandaji yari yitezwe hagati ya kenya n’ubumwe bwa Buraya yarasinywe…

Kubw’ayo masezerano yasinywe hagati ya Kenya n’Ubumwe bwa Buraya, ibidandazwa bivuye muri Kenya bizoshobora kwinjira mu bihugu bigize uwo muryango bitabanje kurihishwa amatagasi uko bizoba bingana kwose.

Ayo masezerano yatanguye kwigwako kuva mu mwaka wa 2016 mu vyo azofasha ico gihugu harimwo kukigwiriza abagwizatunga no guteza imbere ubutunzi bwaco. Nkukwo vyandikwa na TheStar, umwumvikano ugamije amasezerano nkayo wabaye hagati y’Ubumwe bwa Buraya n’ibihugu bigera kuri bitanu bigize umuryango wa Afrika y’ubuseruko EAC harimwo #Urwanda, #Uburundi, #Tanzaniya na #Uganda, ariko Kenya co nyene ni co gihugu kimaze gushobora kuyaterako umukono.

Kongo, umwaka wararumanye intambara zitanguye mu karere ka Bunagana…

Ikinyamakuru RFI kigaruka ku makuru yaranze indwi mu gihugu ca RD Congo, kigaruka ku nkuru ya Africa News aho ico kinyamakuru kivuga ku ntamabara yo mu karere ka Bunagana kari ku rubibe rwa Uganda yakwije umwaka ku wa 13 Ruheshi 2023.

Nubwo habonetse inteko zirungitswe n’umuryango wa Afrika y’Ubuseruko zivuye mu bihugu vya Kenya na Sudani yepfo zija gufasha kugarukana umutekano muri ako karere, umutekano ngo uracagoyagoya cane muri ico gice c’ubuseruko bwa Congo.

Abasanzwe baba muri ako karere bakaba biganiye ishirahamwe Human Right Watch ko abagwanyi b’imihari igwana bamaze kwiba imiryango, baronona bongera baraturira amatungo yayo, utibagiye no guhatira abantu gukorana nabo, abandi nabo bakanabanyuruza.

Mu Rwanda, haratangujwe imyimenyerezo ya gisirikare ihuza ibihugu vya EAC

Iyo myimenyerezo imara indwi zibiri zo nyene, igira iya 13 ibaye. Kuri iyo ncuro yitabiriwe n’ibihugu bitanu : Urwanda, Uganda, Tanzaniya, Uganda n’Uburundi bwarungitse abasirikare, abapolisi hamwe n’abasivile bose hamwe bagera ku 600. Ingabo za Republika iharanira intwaro rusangi ya Congo hamwe n’iza Sudani y’epfo zikaba zititabiye iyo myimenyerezo.

Nk’ukwo tubikesha BBC Gahuza, iyo myimenyerezo ngo igamije gukomeza ubushobozi bwo gukorera hamwe nk’ingabo z’akarere. Kubw’umukuru w’igisirikare c’Urwanda, ngo, ibibazo vy’umutekano vy’iki gihe aho bigeze vyerekana ko ata gihugu coba kicikorana conyene.