Ishirahamwe Soprad caritas Ruyigi rishikiriza ibikorwa vy’iterambere ryaranguriye muri komine ya Gisuru

Hari ku wa 19 Ruhuhuma 2021, aho ishirahamwe Soprad caritas Ruyigi ryashikiriza ku mugaragaro ibikorwa ryaranguye biciye mu mugambi « Twese hamwe duhangane n’ibiza » ERICA, iryo shirahamwe ririko rishira mu ngiro rifadikanije na Caritas mpuzamakungu y’Ububirigi ku buryo bwatanzwe n’ingoma y’Ububirigi biciye mu gisata c’ugufashanya n’iterambre. Uwo mugambi ukaba watanguye muri Ruheshi 2019 ukazorangirana na Rusama 2021, ukaba ufise ihangiro ryo gukirurutsa abenegihugu bo muri Gisuru na cane cane ba ntahonikora mu bijanye no gukinga be no guhangana n’ibiza. Akanyamuneza kari kose mu banyagihugu bo muri komine Gisuru aho uwo mugambi waranguriwe.

Ibarabara ry’ibirometero 25 birenga, ikiraro gihuza komine Gisuru yo mu Ruyigi na Cendajuru yo muri Cankuzo, ibiraro bindi bitobito, amahegitari 220 yarateweko imivyaro irenga 467. 190 y’ibiti ku musozi wa Mpungwe uhanamiye ikiyaya co muri Kumoso, ni bimwe muri vyinshi vyaranguwe.

Mu gisata co gutanga akazi, imiryango 1766 ya ba ntahonikora yararonkejwe akazi mu bikorwa vyo gusubiramwo ibarabara (930) no kugwiza hamwe no gutera imivyaro y’ibiti ku Musozi wa Mpungwe (836) tutibagiye ko muri iyi miryango ya ba ntahonikora iyingana 756 yaronkejwe udukarata twokwivurizako. Mu ntumbero yo gukaburira abenegihugu guhurumbira kuziganiriza kazoza, iyi miryango yose yaronkejwe akazi yarugururiwe amakonti muri COOPEC kugira baze bahemberwako, bica bituma n’umugambi ubaziganiriza amahera 1000 BIF/ku munsi bakoze kugirango igihe ibikorwa bizoba biheze bazoronke amafaranga afadika ashobora kubatuma bikenura, mbere bakagira n’umugambi w’iterambere.

Nayo ico kiraro ngo cubatswe hageze. Pascal Nyabenda arongoye umutumba Nyabigozi, muri komine Gisuru, zone Nyabitare, amenyesha ko urwo ruzi rwataruwe rwari rumaze iminsi rwiha inkumbi. Ni mu gihe abagendesha amapikipiki, ab’amakinga n’abandi bari bamaze kururwamwo ariko bakarokoka kubw’Imana bashika 8. Kubwiwe umugambi ERICA waje kuramira benshi kuko n’imirima ya benshi yakingiwe biciye mu guca imikobeko ahahora haca inkukura ibiterwa bigatwarwa.

Policeline Nyabenda, umwe mu bakenyezi bafashijwe mu mugambi ERICA, biciye mu migwi yo kuziganya no kuguranana, arashima cane ko ishirahamwe Soprad caritas Ruyigi ryatumye ahumuka araheza akura amaboko mu mpuzu yinjira mw’ishirahamwe ryo kuziganya no kuguranana : «Naraguze impene, ndakota imirima, ubu mbere ndagurana n’udufaranga mw’ishirahamwe nkaja kurangura ifu y’ifarini nkakora ibitumbura nkabidandaza nkasumira abana bagafungura kandi ayo naguranye nkayasubizanya n’inyungu hejuru. Ndiko ndiga ukuntu abana banje babiri bari baravuye mw’ishure kubw’ubukene nobasubizayo.»

Ku runhande rw’intwaro, Umupfasoni Emerancienne Tabu, buramatari w’intara ya Ruyigi, nawe nyene ntivyamukundiye ko ahisha umunezero kubw’ivyo bikorwa bifise intumbero yo gukuza umunyagihugu mu bijanye no kwibeshaho ndetse no gukingira ibidukikije. Yarahagurutse arashima cane. Ariko kandi agasaba ko ku nkengera z’ibarabara ryubatswe hariho ibice vy’imiserege bikwiye kwubakwa kugira ngo ibarabara rizorambe, ubona ko uwabaye mwiza ngo aba muzima.

Umushingantahe Alain Van Ghught, aserukira Ingoma y’Ububirigi mu Burundi akaba na we nyene yashimye ingene ishirahamwe Soprad caritas na Caritas Mpuzamakungu y’Ububiligi Ruyigi bashize mu ngiro ivyo bikorwa. Akaba yaboneyeho n’akaryo ko guhamagarira abanyagihugu bose baba mu micungararo eka mbere uwo wese azokoresha iryo barabara, n’ibiraro vyubatswe kubibungabunga kugira ngo bizorame, bizorambe.

Musenyeri Blaise Nzeyimana, Umwungere wa Diyoseze Katolika ya Ruyigi umwe mu bari bitabiriye ivyo bikorwa vyo gushikiriza ivyo bikorwa, akaba ari na we aserukira imbere y’amategeko ishrirahamwe SOPRAD, yagize ati : « Birahimbaye cane kuba ibikorwa vy’iterambere nk’ibi biranguka muri komine ya Gisuru. Hari haheze igihe kitari gito iri barabara narahevye kuricamwo, kuko ryari rimeze nabi cane. Ariko ubu rigiye kuja rirapfunyiriza urugendo benshi.»