Mpinga-Kayove: ActionAid yarafashije ingo n’amashure yahuye n’ivyago vy’imvura

Muri komine Mpinga-Kayove, uwuserukira ishirahamwe ActionAid  ku rwego rw’igihugu Almamo Barrow arikumwe n’abo bakorana mu ntara ya Rutana kuri uwu wa 17 Munyonyo 2021 baratanze ibisakazo n’ibikoresho vy’ishure bimwebimwe ku ngo 30 zakozweko n’imvura. Baranagendeye Ecofo Kimana iriko irubakwa ku mfashanyo irenga imiriyoni 400 bongera bashika kuri Ecofo Mubanga yo muri komine Musongati iriko irubakwa ku mfashanyo y’imiriyoni zirenga 350 z’amafaranga y’amarundi zitanzwe n’iryo shirahamwe.

Bagikubita ijisho amabati, amaferabeto, imisumari, uburingiti, amakaye, amakaramu, n’amafaranga y’amarundi ibihumbi 30 ishirahamwe mpuzamakungu riraba ibijanye n’agateka k’abakenyezi « ActionAid » ryagire ribashikirize, ingo zo muri zone Kayero zakozweko n’imvura akamwemwe kaciye gasomeka ku maso. Batangura gutwenga ahari amaganya n’agahinda ko kwiyumvira aho barara mu gihe imvura yogwa hasubirirwa n’umunezero w’uko bagiye kurara mu nzu zisakaje amabati y’umwakaka.

Nzikwitonda Pélagie umwe mu bakozweko n’imvura n’umunezero mwinshi ati: « ActionAid, ni umuvyeyi w’impfuvyi n’abapfakazi. Ntiyaga amasigaracicaro. Kuva imvura yansamburira akazu, ikonona utwo nari mfise, naciye nihebura. Nabona ko ngiye kwama ndaturatura mpiga aho nsaba indaro. None ActionAid iransakariye, indosa uburingiti bwo kwipfuka, amakaye n’amakaramu y’abana. Akabirya rero ica irenzako amafaranga y’abafundi 30.000Fbu. Jewe ndi umupfakazi, ndeze impfuvyi nari mbayeho nabi. Muvy’ukuri ntaho nokuye ibisakazo. ActionAid muragahoraho, muzohore museruka ku bagowe. » 

Kanyoni Philippe musitanteri wa Mpinga-Kayove yakengurutse ibikorwa vy’uwo mugambi wa ActionAid, aca agirako anasaba ko, iryo shirahamwe ryokwagura akarere rikoreramwo muri iyo komine gutyo abanyagihugu bo mu mihingo itandukanye y’iyo komine bakungukira ku migambi irangurwa na ActionAid. Ntiyibagiye no gusaba ko hamwe vyoba bishoboka boshigikirwa no muyindi migambi yiterambere nko kubaka amabarabara n’amasoko..

Almamo Barrow amenyesha ko, ako gafashanyo bokabashimira kuko muvyo ishiramwe ririko rikorerako aha nini ari   uguteza imbere agateka k’abakenyezi ibicishije mukurwanya amabi akorerwa abakenyezi  hamwe no kwiteza imbere kwa abakenyizi mu vy’ubutunzi. Ikindi, ikijanye no guhangana ni ingaruka zi ihindagurika ryi ibihe biri muvyo ActionAid ishira imbere. Igiciro c’ivy’atanzwe muri izo ngo 30 rero kikaba kirenga gato imiriyoni 30 z’amafaranga y’amarundi.

ActionAid igendera Ecofo Kimana iriko irubakwa ku mfasahyo irenga imiriyoni 400 Fbu

Ecofo Kimana iri muri zone Kayero, Komine Mpinga-Kayove. ActionAid izohubaka ibirasi 9, bitatu bikaba vyaramaze guhera, mbere abanyeshure ubu baranavyigiramwo. Hariko harubakwa ibindi birasi bitatu vyitezwe ko bizinjirwa mu ntango z’igice ca kabiri. Hazonakwubakwa ibiro vy’umuyobozi, hubakwe utuzu twa sugumwe dutandukanye kubahungu na abakobwa, itangi y’amazi yo yaramaze gushirwaho. Iryo shure rizoshirwamwo intebe, ububati, n’ibindi. Josias Ogden Ukuriniyesu ajejwe imigambi ya ActionAid amenyesha ko ibijanye no kwubaka iryo shure bizotwara imiriyoni zirenga 400 z’amafaranga y’amarundi muntumbero yo guteza imbere indero ya akanovera no guha amahirwe abana ba abakobwa kwijukira amashuri co kimwe nabahungu.

Bernard Nyandwi aserukira abigisha yagize ati: «  Ni intererano idasanzwe ishirahamwe ActionAid iduhaye. Iyi Ecofo Kimana ifise abanyeshuri 251. Abakobwa 126 n’abahungu 125. Ariko ryari rifise ibirasi 2 gusa na vyo nyene bikigamwo abana bo mu mwaka wa mbere n’uwa kabiri. Abasigaye bo kuva mu wa gatatu gushika mu wa gatandatu twabasabira aho bigira muyandi mashuri kure yi imihana yabo, bakiga bakurakuranwa aho barenga 100, canke bagaterana aho abanyeshuri badashika 100 mu kirasi. Nta n’amazi yahora arangwa kuri iyo Ecofo Kimana icibagiwe co ni utuzu twasugumwe kuko ngo abana bahora bitabarira mu biti vy’imikaratusi. » Nyandwi akavuga ko ubu abana bagiye kwiga borohewe, ku bw’iyo mfashanyo y’amashure mashasha bariko barubakirwa na ActionAid

ActionAid yaranashitse kuri Ecofo Mubanga muri commune Musongati iriko irubakwa ku mfashanyo y’amafaranga arenga imiriyoni 350Fbu

Ecofo Mubanga iri muri komine Musongati yo mu ntara ya Rutana. Iryo shure rifise ibirasi bibi cane bitabereye kwigirwamwo. Mbere abavyeyi barigiriye inama yo kwiyubakira ibirasi 5. ActionAid na yo ikaba yaciye ifata ingingo yo gushigikira iryo shure. Ubu iriko irasanura ivyo birasi vyubatswe n’abavyeyi, ibigira neza. Ivyo birasi 5 nivyahera gusubirwamwo mu ntango z’ukwezi kwa Nzero 2022, hazoca hubakwa ibindi birasi 4 bishasha, hubakwe inzu 6 z’utuzu twasugumwe dutandukanye ku abahungu n’abakobwa, hasubirwemwo ibiro vy’abigisha, hashirwemwo intebe, imeza, ububati n’ibindi bisanzwe bidahari. Ivyo bikorwa vyose bikaba bizotwara imiriyoni zirenga 350 z’amafaranga y’amarundi, nk’uko bishikirizwa na Josias Ogden Ukuriniyesu ajejwe imigambi muri ActionAid.

Bikorimana Jean Claude yaserukiye umuyobozi w’iryo shuri, avuga ko iryo shuri ryari risanzwe riri mu mashuri ameze nabi, kuko ryama ryagurutse bakongera bakarisakara. Abana bahiga ni 420, bagizwe n’abahungu 208 n’abakobwa 212. Aba rero ngo iyo baje mw’ishuri baguma basenga basaba ngo imvura ntigwe, kuko iyo iguye baca biruka baja guhiga iyo bugama. Akaba akenguruka ko ActionAid igiye kubaronsa ishuri ryiza rizotuma abanyeshuri biga batekanye, ata bwoba bw’imvura n’ibihuhusi bafise. 

Musitanteri wa komine Musongati Claudine Niyoyitungira nawe nyene arakenguruka ivyo bikorwa ActionAid iriko irarangurira muri iyo komine aramutswa. Agasaba ko bobandanya babafasha no mu bindi vyinshi kuko ata n’amashirahamwe menshi asanzwe abafasha. Yagiriyeko anasaba iryo shirahamwe ko ryozofasha mu gusakarira ingo zingana na 51 zasambuwe n’imvura ivanze n’igihuhusi.

Almamo Barrow yamenyesheje ko ata co batazokora giteza imbere indero y’abana biga, kandi ko hoba ihimirizwa ku bana b’abigeme bagakundishwa ishure kandi bakarigumako. Hanyuma, yavuze ko iterambere rigenda riranguka bukebuke gushika ritsimbataye. Yasavye ko ayo mashuri bubakirwa boyafata neza kuko ari ayabo. Yarangije avuga ko ibishobaka babona vyihutirwa bihuye n’indinganizo y’urutonde bariko barakorerako bazogira ico baterereye.