Imiriyoni zirenga 440 ni zo ikigo OBR catoje mu mezi 4 ku bidandazwa vyinjijwe bidaciye mu mategeko

Mu kiganiro caremeshejwe na Audace Niyonzima, komiseri mukuru w’ikigo kijejwe gutoza amakori n’amatagisi OBR, kuri uwu wa 2 Ruheshi, yamenyesheje ko hatewe intambwe ishemeye mu bikorwa vyo kugwanya iyinjizwa ry’ibidandazwa bidaciye mu mategeko mu ntango y’uwu mwaka wa 2020.

 Audace Niyonzima yagize ati : « Nk’uko biri mu vyo ikigo OBR ciyemeje, igikorwa co kugwanya iyinjizwa ry’ibidandazwa biciye mu buryo butemewe n’ametegeko cagenze neza bituma hinjira amafaranga angana 440.810.604 y’amarundi ku madosiye 777 yizwe kuva muri Nzero gushika muri Ndamukiza 2020 ».

Uwo mukomiseri yamenyesheje ko ibidandazwa vyafashwe vyinjijwe biciye mu nzira zitemewe n’amategeko vyari bigizwe n’ibitenge, amaterefone, ibinyobwa, imivinyu, « liqueurs », amapikipiki yafatanwe impapuro za magendu. Vyaribonekeje ko habaye ububeshi bw’abadandaza mu kumenyesha ibitigiri n’agaciro k’ibidandazwa vyinjijwe bitari vyo, hacishwa mu binywabi ibidandazwa vy’agaciro kangana imiriyoni 256. Niyonzima akamenyesha ko ivyo bidandazwa biva ahanini mu bihugu vya Tanzaniya, RDC, ibihugu vyunze ubumwe vy’abarabu « Emirats arabes Unies », i Dubaï. 

Uburyo bwashizweho mu ntumbero yo gutuza abo badandaza

Komiseri mukuru w’ikigo OBR yamenyesheje ibi : « Mu ntumbero yo gushigikira no gutera intege igikorwa co gutuza ingendo yo kwinjiza ibidandazwa bicishijwe mu binywabi, harashinzwe itegeko rivuga ko umuntu azobona uwinjije ivyo bidandazwa muri ubwo buryo akabimenyesha ikigo OBR, azoronswa ic’icumi c’agaciro k’ivyari vyinjijwe maze uwo muntu akagumirizwa akabanga ku bw’imvo z’ukumukingira umutekano. Ivyo vyatumye amafaranga yatojwe muri ayo mezi ane ya mbere y’umwaka wa 2020 yiyongera ugereranije  n’ayinjijwe mu gice ca mbere c’umwaka wa 2019. Mu ntumbero kandi yo kugabanya iyo ngendo, harafashwe ingingo ruhasha nko guhanisha umunyororo uwufashwe ndetse akanacibwa ihadabu mu gihe itegeko ryari rihasanzwe ryategekanya ko uwufashwe ahitamwo igihano kimwe muri ivyo bibiri ». Aragabisha kandi abakozi b’ikigo OBR bashobora kuba binyegeza inyuma y’iyinjizwa ry’ibidandazwa mu nzira zitemewe aho yagize ati : « No mu bakozi b’iki kigo na ho nyene haracungerewe. Muri iki kiringo c’amezi ane abakozi bashika 5 baramaze gufatwa ubu bari mu munyororo ».

Hamwe n’ivyo, Komiseri Niyonzima yaragize kandi ico ashikirije ku bijanye n’inyuruzwa ry’amakori n’amatagisi: « Muri ayo mezi 4 ya mbere, hafi amafaranga angana imiriyoni 2,4 z’amarundi ni yo yinjijwe ku madosiye 18 yizweko ».

Ikiganiro kikaba casozerewe n’ibibazo vy’abamenyeshamakuru, muri vyo  hakaba habajijwe nimba ikiza coronavirus kitoba caragize ico gihungabanya mu bijanye n’amafaranga yinjizwa mu makori n’amatagisi mu Burundi. Kuri ico, komiseri Audace Niyonzima yamenyesheje ko ingaruka zayo ku makori n’amatagisi zidateye ubwoba kuko amafaranga yatojwe mu mezi ane ya mbere y’umwaka yarenze ayari yitezwe.

Mu ntumbero yo gushira mu ngiro umugambi « Tuyage » ufashwe mu mugongo na USAID, ikinyamakuru Jimbere cifadikanije n’ishirahamwe Search For Common Ground Burundi mu gikorwa co kwandika inkuru zijanye n’ivy’ubutunzi mu gihugu