Kuronka imatera ni umuzi w’ibuye muri kaminuza y’Uburundi

Mu buraro bw’ikigo co ku Mutanga, ikibazo co kuronka imatera gisigaye cabaye umuzi w’ibuye. Bamwe mu banyeshure baronkejwe ivyumba birabananira guhita mwo kurara kw’isaso gusa kubera ukubura imatera. Abatari bake mu bari barahawe ivyumba baza baratanguye kwiyumvira kwisubirira muri karitiye aho bahora bapanze kuko naho barara ku matera imwe ari nka bane, ngo bararyama bagasinzira.

Ikibazo co kuronka imatera muri Kaminuza y’Uburundi, kijanye n’igwirirana ry’abanyeshuri: icugurura, mu 1964, yari ifise abanyeshure 162, uwinjiye kaminuza agahabwa uburaro bwiza akanafungurirwa. Muri 2019, abanyeshure bayigamwo ni 9.000, abafise uruhusha rwo kurara no gufungurirwa na kaminuza akaba ari 2.000.

Aho ibitigiri vy’abanyeshure bigiye biriyongerera, kuronswa uburaro vyahavuye bitaba ivya bose, biba ivy’abagendana ubumuga hamwe n’abari imbere y’abandi mu manota yo mu mwaka wa kabiri ushira uwa gatatu.

Aho hose vyari bizwi ko kuronka icumba biherekezwa no kuronka imatera, naho yashika mu cumba bamuhaye akahasanga ivyangombwa bigize inzu nk’imeza, intebe, igitanda, akabati eka n’utundi tuntu two munzu. Ubu ho ni ibindi…

«Ese kuja gusaba indaro wari warahawe uburaro »

Jean Louis Elvis Niyimburanira, ni umwe mu bahanzwe n’ico kibazo. Yidoga agira ati: « Jewe ubu ndi mu wa gatatu mbere  naranasimvye inkoko (kumenya udasubiye mwo). Nararonkejwe icumba ngira ngo ndaruhutse imiruho yo muri karitiye ariko nsanga ninjiye mu bindi bibazo. Hafi amezi indwi agire yuzure nararonkejwe icumba ariko nta matera ndambika ko umusaya nahawe. Nanje sindi buryame kw’isaso gusa. Nituye kenshi uwubijejwe akambwira ko ata matera ziri mu bubiko. Ndamubajije uko nobigenza akanyishura ko nokwigurira rwanje nkayizanira, (ibitonshobokera bivanye n’ubuzima nsanzwe mbaye mwo) ».

Bimwe mu bituma haba ikena ry’imatera

Nk’uko Boniface Nzohabonayo, uwujejwe ivy’uburaro mu kigo co ku Mutanga abimenyesha, ngo imatera zihari ni nke ugereranije n’igitigiri c’abanyeshure bahawe ivyumba. Uwo avuga ko zahahoze mbere nyinshi ariko zigenda zirahera uko imyaka ihaca. Ariko rero ngo hari n’abanyeshure bihaye ingendo igayitse yo kuziba mbere bamwe ngo baramaze no gufatwa.

Mwomenya ko iyo myidogo yumvikana no mu bindi bigo vy’uburaro vya Kaminuza nk’i Kiriri, i Zege eka no mu Kamenge. Naho biri uko, uwo ajejwe ivy’uburaro mu kigo ca Kaminuza y’Uburundi kiri ku Mutanga ari na co cakira abanyeshure benshi, amenyesha ko batumyeko imatera zigera ku 200 zizoba zirasahiriza mu kurindira ko izindi ziboneka.