Abana baba muri site Sobel ntiborohewe

Abarenga 5016 ni bo bamaze guharurwa ku miryango 1435 y’abateshejwe izabo n’imyuzurira y’ikiyaga Tanganyika hamwe na Rusizi, yegeranirijwe muri Site Sobel, iri muri zone Maramvya komine Mutimbuzi intara ya Bujumbura. 1802 ntibarashobora kuronka ibibanza ku mashure ngo bige…

Ucinjira muri iyo site wakirwa n’urwamo rw’abana bamwe bariko barakina hanze abandi na bo bariko barigishwa mu mahema indani. Winjiye, uturirimbo ni two tukwakira ntiwokwibazako ari abana bari mu buzima butoroshe. Abigishirizwa mu mahema n’abana bafise imyaka iri hagati y’ibiri n’itanu bazanwa n’abavyeyi babo kugirango baronke aho baguma ntibagume bayerera. Mu vyigwa babigisha harimwo gusoma indome hamwe no guharura tutibagiye n’uturirimbo.

Usivye ko abo bana babura aho biga n’abahafise usanga bafise ivyiyumviro vyo guheba ishure bivanye n’ubuzima baba babayemwo nko kubura ico bafungura n’ukuntu urugendo usanga bagira aba ari runini mu gihe bagiye kw’ishure.

Nk’uko bishikirizwa na Philémon Nshimirimana, asanzwe akora mw’ishirahamwe SAD ( Social Action for Development) risanzwe ririko rirafasha abari muri iyo site, ngo ibibazo bitari bike birabugarije : « Abana baba muri iyo site haraho birukanwa ku mashure bivuye ku kubura amahera bariha ku mashure , kubura impuzu zo kwambara kuko kuri benshi zaratwawe, ikibazo c’ibura ry’imiti kw’ivuriro ribegereye aho usanga umwana bamujana kwa muganga akabura imiti bikaba ngombwa ko aja kurindi vuriro eka no gufungura ngo ntibishemeye. »

Aho muri iyo site hari ababa mu mahema agizwe n’icumba na salon, abandi baba mu duhema duto aho umuryango wose usanga barara hamwe, abandi na bo baba mu nzu nini yahoze ari indaro y’inka ariko yubatse kijambere ababa muri iyo nzu ni imiryango 20. Ababa muri iyo nzu nini barara hamwe ari bose yaba umugabo n’umugore ugasanga bararana n’abana. Nta kintu na kimwe kihatandukanya gihari.

Indero, ni ikindi kibazo gikomeye

Muri uko kurarana kw’abana n’abantu bakuze biratuma haduka indero mbi ku bana ngo ntakiba kikinyegejwe kuko abavyeyi barangura amabanga yabubatse abana babona bugaca na bo babisubiramwo.

Ikindi na co ubwogero hamwe n’utuzu twa sugumwe vy’abahungu n’abakobwa ntibigira ikibitandukanya, ivyo bigatuma ababa bafise agatima k’ubutandero kigaragaza na cane cane ko mw’ijoro haba hari umwijima kandi utwo tuzu twa sugumwe na two tukaba turi kure y’uburaro.
Si ivyo gusa muri iyo site hari ibibazo bitandukanye nk’uko bishikirizwa na Thierry Kwizera, umuremeshakiyago muri SAD ngo akenshi hari igihe imiryango itata ikaja mu mpari bivuye ku bibazo vyabo, abana na bo bakarwa mu mporero kuko hari abaca barengera kubana babo bagakubita,

Ikindi na co muri iyo site hari abavyeyi babanyakigongwe bashobora gutora abana ba bagenzi babo bari kumwe muri iyo site bakabafasha n’ubwo na bo nyene usanga ata kinini birengeje.

Thierry Kwizera amenyesha ko bariko barakora uko bashoboye ngo abana bari mu buzima bugoye muri iyo site kugira baronke imiryango ishobora kubafasha ico bita ‘parrainage’ haba kubigisha baba mu miryango yabo canke bakaja kurererwa mu miryango yabemeye kubafasha, akagirako asaba ababishoboye bose kuzofasha muri uwo mugambi uzoja mungiro vuba.

Abo baserukira SAD kuri iyo site uko ari babiri bamenyesha ko hagikenewe amahema atari make kugirango hashobore kuboneka aho bashira iyo miryango ikiri muduhema duto eka n’abari mu nzu nini ari benshi kugira ngo barabe ko indero y’abana yosubirwako mu gihe boba baronse uburaro butandukanya abavyeyi n’abana. Baranasaba kandi ko bokubakirwa amashure ngo kuko urugendo abana bagira ari runini mu gihe baja kw’ishure abandi na bo ata bibanza bafise ku mashure.

Kino gisomwa canditswe na Liesse Niyomuhoza mu ntumbero yo guha ubumenyi abaciye mu mugambi « Enfants Journalistes » wa UNICEF ushigikira ijwi ry’abana ku bibazo bihanze abana.