Ihiganwa rije guhangana n’inda z’indaro mu masomero, mu ntara za Gitega, Muyinga, Bururi na Rumonge

Amashure ari mu ntara zine arizo Gitega, Muyinga, Bururi na Rumonge ni yo aza kw’isonga mu bitigiri vy’abanyeshure batwara inda z’indaro kuva mu mwaka wa 2014 gushika mu wa 2017. Ni muri iyo ntumbero ubushikiranganji bw’indero n’inyigisho z’imyuga bufadikanije n’ishirahamwe mpuzamakungu Care bwatunganije ihiganwa ry’inyandiko muri ayo mashure kugira batuze iyo ngeso.

Kuri uyu wa 31 rusama, ubushikiranganji bw’indero n’inyigisho z’imyuga bufadikanije n’ishirahamwe mpuzamakungu Care, bwuguruye icese ihiganwa ry’ukwandika ryerekeye ihohoterwa rifatiye ku gitsina na canecane inda z’indaro mu ntumbero yo gusubiza agateka umwigeme nawe yige yisanzuye, yubahirijwe mu gateka kiwe.

Umushikiranganji w’indero Janvière Ndirahisha, agira ati: « Iryo higanwa rije hageze kuko rizofasha ubushikiranganji kumenya aho igikorwa kigeze mu kurwanya inda z’indaro mu mashure biciye mu migwi ihasanzwe yiyemeje guhagurukira kugwanira agateka k’umwigeme no kugwanya inda z’indaro mu mashure. Rizokoranya abanyeshure, abarezi eka n’abenegihugu bose bo mu micungararo y’ishure bavyipfuza kugira ngo haboneke amashure meza arangwa n’inyifato ibereye, amashure agwanya bishemeye ihohoterwa rifatiye ku gitsina ».

Iryo higanwa ryoba ritunganijwe gute?

Iryo higanwa rizobera mu makomine 28 agize intara zine (Gitega, Muyinga, Bururi na Rumonge). Ibitigiri vy’abanyeshure biga muri ayo mashure shingiro n’ayayakurikira ari muri izo ntara bikaba ari 5000 . Umunyeshure wese azokora ico kibazo co kwandika, azisunga icivugo : « Ishure ryiza aho naribonye, aho narisanze », maze hatangwe amanota, haboneke aba mbere biyambitse umutamana, haboneke n’ishure ryiza riza ubwa mbere mu guharanira agateka k’abigeme no kurandurana n’imizi inda z’indaro mu mashure.

Naho ubushimwe butaramenyekana neza, Umushikiranganji w’indero aremeza ko abazoba bakoze neza batazotaha iminwe misa.

Hari umwizero ko iki gikorwa kizogira ivyo gihindura?

Juvenal Afurika ni umuyobozi mukuru w’ishirahamwe mpuzamakungu Care mu Burundi. Kubw’iwe, iki gikorwa c’ihiganwa cimirije kuba, ngo hari ivyizigiro ko kizogira ico kimara, kuko ngo amashure azoba yaronse amanota meza azoheza akabera ayandi akarorero ndetse bigatuma ayazoba yabaye ayanyuma agira inguvu mu kugwiza inyigisho zo kurwanya iyo ngeso isa n’iyabaye akaranda mu mashure.

Eka n’Umushikiranganji Ndirahisha ngo arizigiye ko iryo higanwa ryimirije kuba rizogira ico rifashije ubona ko ivyiyumviro bizokwivira muri urwo rwaruka nyene. Ngo mu vyo bazokwandika bazomenyesha kumbure ikibatera kuja muri izo ngeso, ingorane n’intambamyi bahura eka mbere banatange n’intererano bo nyene y’ivyokorwa kugira ngo bihere burundu.

Ikibazo c’inda z’indaro zatse indaro mu mashure n’ihohoterwa ry’agateka k’abakenyezi muri rusangi ntigikwiye kuba ica bamwe mu gihe abandi biraramiye. Nyabuna tuje hamwe, umwe wese agire ico akora, duhagurukire rimwe tukirandurane n’imizi, twese biraturaba.