Ibanki Bancobu yararonkejwe impapuro zemeza yuko ikora ibikora inka

Ku ncuro ya mbere mu Burundi, ibanki Bancobu yararonkejwe icarimwe impapuro 3 (certificats de conformité aux normes ISO) zemeza yuko ikora neza yisunze ingingo ngenderwako zemewe ku rwego mpuzamakungu mu gisata c’amabanki. Kuki Bancobu yaronkejwe izo mpapuro? Mbega ho zoba zizoyifasha iki? Turabibayagira.

Ku wa 26 Ndamukiza 2022, ni ho Bancobu yashikirizwa icese izo mpapuro. Abari mu buyobozi bw’iyo banki, abayifisemwo imitahe, abanywanyi babo ndetse n’abandi batumire bari bishikiye kuri Van Beach Resort mu gisagara ca Bujumbura kugira bigine iyo ntambwe idasanzwe ishitsweko n’ibanki ya mbere ndundi.

Dogiteri Teguza Raymond asanzwe akora mw’ishirahamwe “SQS” karuhariwe mu bikorwa vyo gutanga impapuro nk’izo haba mu Busuwisi no kw’isi nzima ni we yashikirije izo mpapuro. Ni we yatanze n’insiguro yazo: “Urupapuro rwa mbere ni urwitwa ISO9001/2015. Rwemeza ko ibikorwa vya banki bitunganijwe mu buryo bwiza. Urugira kabiri ni ISO14001/2015, uru na rwo rukaba rwemeza ko ibikorwa vy’iyo banki atari ibibangamira ibidukikije. Nayo urugira gatatu ISO45001/2018 rusigura yuko amagara y’abakozi ku kazi yitaweho neza.

Umukozi aberwa n’impembo…

Kuba ibanki Bancobu yararonkejwe impapuro nk’izo icemezo cuko ikora bigashimwa. Uko gukora neza na kwo kukagaragarira mu kungene ishimisha abayitura, abayifisemwo imitahe abakozi bayo ndetse n’igihugu muri rusangi.” Girukwishaka Trinitas umuyobozi w’ibanki Bancobu ari na we yashikirije ayo majambo, avuga ko ibanki arongoye yakoresheje ukwitanga gukomeye mu bisata vyose biyigize kugira ishike kuri iyo ntambwe.

Trinitas abandanya amenyesha ko bagwije ibisata nkenerwa n’abaywanyi babo bimwe barateza imbere n’ikoreshwa ry’ubuhinga bwa none biciye mu gisata “Bancobu eNoti”. Ku banyamitahe, ibanki Bancobu ngo itanga umwimbu ushimishije. Ku bakozi na bo ngo iranabaronsa uburusho butandukanye nko kubakarihiriza ubumenyi, kubaronsa ingurane izimbutse, kubavuza n’ibindi. Nk’uko uwo muyobozi abandanya abivuga, ibanki arongoye ngo ntitangwa no mu gushigikira ibikorwa vy’iterambere mu gihugu.

Atanga akarorero, avuga ko kuva mu 2011 gushika mu 2021 umwimbu wa Bancobu wiyongereye incuro zirenga 11 zose, ayashika ku miriyaridi 55 nayo umutahe wayo bwite hamwe n’ubutunzi bwose hamwe birongerekana incuro zishika 8 bigera ku miriyaridi 153,9 na 115,8 z’amarundi.  Mu guterera mw’iterambere ry’igihugu, ibanki Bancobu yaraterereye imiriyaridi zigera kuri 6 z’amafaranga y’amarundi mu myaka ibiri iheruka, uwa 2020 na 2021. Iruhande yo kwubaka ikiraro c’abagenda n’amaguru gica hejuru y’ibarabara ryitiriwe Uprona mu gisagara ca Bujumburura, iyo banki ngo yimirije no gusubiramwo neza amabarabara akikuje ibiro vyayo bikuru.

Bancobu ku rubuga mpuzamakungu

Izo mpapuro Bancobu yagabanye burya ngo izozikamisha. Nkako ngo ni ikimenyetso ntahinyuzwa gitanga ishusho nziza ku bijanye n’ingene ibanki ikora kandi cemewe no mu makungu. Bancobu ironse izo mpapuro yari isanzwe iriko irashira mu ngiro umugambi wayo udasanzwe wo kuva mu 20221 gushika mu 2024 ushingiye mu kuzana akabirya no mu kugwiza umwimbu.

Nzeyimana Gilbert, icegera c’uwurongoye urwego nshingwantwaro rwa Bancobu avuga ko ari akaryo keza cane kazotuma ibanki ishobora gushika kuvyo itari bwashikeko : ”Bancobu izoshobora kugwiza uburyo bwinshi, bitume ishobora gutunganiriza abaje bayigana bipfuza ingurane kugira bashire mu ngiro imigambi minini y’iterambere. Ako karyo kandi kazotuma Bancobu ishobora guteza imbere ubumenyi bw’abakozi bayo, bashobore kujana n’ubuhinga bwa none budahengeshanya gutera imbere, ije ku rubuga mpuzamakungu mu kugira amashami mu bihugu vyo mu karere ka Afirika y’ubuseruko yongere inagwize ayandi ma banki bikorana ku mu bihugu bitandukanye n’ibindi n’ibindi.

Izo mpapuro ibanki Bancobu yaronkejwe zimara igihe c’imyaka itatu, banki igasubira ikazironswa bivanye n’ingene yagumye yubahiriza ibisabwa kugira izihabwe.