Barya ba mama badandaza imboga n’ivyamwa, tubacako turengana,iyo tubashoreye naho, mukudindiza ku giciro tukiva inyuma. Naho ntari busume naramuyagishije. Uwo mukenyezi, bike twayaze, yaranyugururiye umutima ansangiza intuntu. Bintuma nandika iki cese...

« Izuba ritaramenera i musozi;

Umutwenzi utaratamanzura;

Umuhererezi i mugongo;

Umucuko n’impamba antwaje.

Nja mu kaguriro n’agatoke nshoye;

Ndabe ko Misago na Miburo bobukura mu cibo;

Cibure ko isomero ryokwiyuhira ku rindi

Ejo bankure akuya nkire inzira.

Umucance yashengeye ansigira bane;

Umuryango unsendera kuri muramwanje ancure;

Ncurikira umutwe mu maboko ndanka ndahetura;

Bampa akaruri, itongo baranyaka ndayanyaga.

Ncika igisubira muhira, nsubiranayo intuntu;

Ntura intekera, ntekerwa n’akabonge ;

Nsaba Rurema igarukire umusavyi ;

Umupfakazi umwosore yarize iwumuhanagure.

Mama yampaye igisimbo nsimbizamwo abuzukuru ;

Nshora agatoke baramuke, akajumbu kabajumbure ;

Imvura y’urushana, izuba ryo mu ci singoheka namizako;

Inzara mu nda, umusonga i mugongo sincika intege.

Ejo nzoramura, gito kirakura;

Mana ndabira ryiza abana, abasavyi bawe;

Se ni ababere umuvunyi, abashikire i Bwami;

Barabe ryiza, bashikire aho ntari bushike.« 

Mbanyi yatanze ubuzima ni nde yoguhoza kurusha uwakuremye? Ni nde yogukura umuruho wa minsi yose ? Wewe urinda imbeho y’igikonyozi, izuba nta co rikubwiye, ukora ata gatutungo uwawe ashike mu bigero. Maboko igihumbi humura!

Igisomwa ca Guy Adronis Nimfasha