Dutahure uruhara rw’abahurikiye mu kibano mu ndinganizo « AGE » ya Menyumenyeshe

Kugira habe impinduka ishimishije mu bijanye n’irondoka rijanye n’amagara meza, abahurikiye mu kibano n’abo bafise ikibanza gikomeye, kuva kubahuzamigambi ba Menyumenyeshe, urwaruka rw’abakoranabushure, abajejwe intwaro, eka mbere n’abamenyeshamana ntibibagiwe.

Kuva aho hatanguriye indinganizo ihurikiyemwo bose ku mashure mu mugambi wa Menyumenyeshe harahindutse ibitari bike. Kimwe muri ivyo vyahindutse ni ugushira hamwe abo bose begwa n’indero y’urwaruka mu kibano no ku mashure. Ivyo navyo bikaba vyabonywe nk’uburyo bwiza bwo gutuma indero y’urwaruka hamwe n’ubumenyi mw’irondoka rijanye n’amagara meza vyisununura.

Consolata Ndikumana, asanzwe ari umuhuzabikorwa mu runani Menyumenyeshe rwo mu Rutegama, Komine n’intara ya Gitega aratuyagira igikorwa ciwe muri Menyumenyeshe kuva aho hatanguriye indinganizo ihurikiyemwo bose ku mashure: « Nd’umuhuzabikorwa wa Menyumenyeshe ng’aha mu runani rwa Murima, bisigura ko ntegerezwa kuraba y’ukwo ibikorwa bikorerwa mu migwi  ko bikurikiza intumbero yashizwe imbere na Menyumenyeshe. Ndagerageza kuraba ko twese tugenda dutahura kumwe iyo ntumbero n’ihinduka twiteze mu rwaruka no mu kibano. Ku mashure ndayaga n’abigisha-barezi kugira ngo ntihabeho guhesha muri uyu mugambi wa Menyumenyeshe kuko uru en n’urugamba turiko kandi kwigisha n’uguhozako na ntaryo. »

Igikorwa ciwe ariko ngo ntigihereraho. Umupfasoni Consolata arongera akaza arahura n’abatanga inyigisho abo ni nk’abigisha barezi, canke urwaruka rw’abakorerabushake kugira bayage ku buryo bubereye bw’ugutanga inyigisho za Menyumenyeshe.

Emery Ishimwe, umukorerabushake wo mu runani Menyumenyeshe rwa Murima  muri Komine n’intara ya Kayanza we avuga ko mu ndinganizo  ihurikiyemwo bose ku mashure akora akazi ko guhuza urwaruka rwo ku mashure n’ikibano rubayemwo aho n’ukuvuga nk’amavuriro, abahurikiye mu kibano, abajejwe intwaro eka mbere n’abamenyeshamana.

Mbega abajejwe intwaro hamwe n’abamenyeshamana ntibibagiwe ?

Ihi bambewe. Ernest Ntawukirishiga , umuhanuzi wa musitanteri ajejwe ivy’imibano muri Komine ya Gitega atubwira ko n’abajejwe intwaro batibagiwe muri iyi ndinganizo ihurikiyemwo bose ya Menyumenyeshe : « Uruhara rwacu n’urwo gukingira ibikorwa vya Menyumenyeshe bikaba ata nkomanzi. Ikindi naco abantu bomenya n’ukwo burya akarere kose kagira imico yako, twebwe rero nk’abajejwe intwaro turafashanya n’abo muri Menyumenyeshe kugira habe itangwa ry’inyigisho rihuye n’ico urwaruka  rwo mu turere  rwipfuza gusumba. »

Ntawukirishiga arongera akamenyesha kandi ko nk’abajejwe intwaro baganira n’abamenyeshamana babatumirira kwubahuka kuganirira urwaruka ibijanye n’ubuzima ndoragitsina.

Bishop Pierre N. ari mu barongoye urunani rw’amashengero rwo muri Kayanza ati: « Menyumenyeshe yaratwubahuye, Ubu ntudutinya kuganirira urwaruka ku bijanye n’irondoka rijanye n’amagara meza kandi twasanze bifise akamaro kanini kuko ibihindura abandi si ubutumwa bwo muri Bibiliya gusa. » Gushira inguvu hamwe kugira haboneke impinduka ng’ivyo ibituma indinganizo ihurikiyemwo bose ya Menyumenyeshe ku mashure ishobora gutanga ivyamwa bishimishije.