Akamwanya katabora gasigaranye ikiringo c’ijoro rimwe mu Burundi

Ubujorojoro ni ubusa. Ng’iyi ya tariki 8 y’ukwezi kwa 2 ihagarika burundu ikoreshwa ry’utumwanya irageze. Mbega utwo iryo sango buca risanga mu tuguriro biragenda gute ? Tuzoturirwa ? Canke tuzongerwa ikiringo? Ibitekezo  bidusubirira vyo biriho bikwiye ? Ni muri iyi nkuru.

Karaba  utire agashambara umere nk’uwitembereza kw’isoko ya Cotebu, kwa Siyoni  n’ahandi  wirabire. Utumwanya turacakoreshwa ukuri kwamye. Si umudandaza, si umusumyi, bose badukoresha ata co binona.

Umudandaza arazi ko ata ruhusha afise rwo gusubira kurangura utundi, mbere n’utwo afise aracagerageza kudusohora. None ko tudahera ariko ikiringo  caheze, biragenda gute? Iyo tuba uturibwa yodushiriye abana canke abavukanyi bakihombora. None…

«None ga yemwe nzotekera amakoto mu gasaho k’igikarato» ?

Françoise  Ndayiragije yabaye nk’uwukanguka  yibutse ko buca akamwanya gacibwa burundu mu Burundi. Yagize ati: « Nari naribagiye gose ivy’iyo tariki. None ga yemwe ngiye kubikika nte ko naringifise umuceri ntekera ikirokiro canke nkagira inusu, nkanapfunga n’uturobo? Utumesa, udukoto tw’amahera 100 canke 200, nzohora ndadutekera mu rupapuro» ?

Tharcisse Bapfekurera, asanzwe adandariza kw’isoko kwa Siyoni wewe ngo aracazazaniwe. We yari yizigiye ko iyi tariki y’umunani izoshika haramaze kuboneka ibitekezo bikwiye, ku buryo ata mukiriya azobura ico atwaramwo ibisumwa uko bingana kwose. Ariko ngo si ko biri. Agira ati :« Nimba hariho ababishoboye, baraturonderera utumwanya tubora kuko turabangutse no gutekereramwo umukiriya».

Hasigaye amezi 4 utumwanya twose dusubirizwe n’ibitekezo bidatitura isi: ntibizokworoha

Ishirahamwe Elicom ngo ririteguriye gutorera umuti ico kibazo

Eric Kwizera asanzwe atanga inkuru akanaserukira n’igisata c’ubudandaji muri Elicom agira ati :«Mu bisanzwe twe twahora dukora ibitekezo twisunze igitigiri c’ivyo abakiriya bacu badutumye, ari nko mu ma alimentation, mu ma-Pharmacie, boulangerie kandi ntitwigera dukehanirwa kuko turafise ibikoresho bikwiye»

Eric amenyesha ko gushika ubu ishirahamwe Elicom rishobora guhingura ibitekezo birenga 120 000 ku munsi. Ariko rero agashikiriza ko bashobora kubirenza canke bikaja munsi y’ivyo bivanye n’umurindi w’ababitumako.

Uwo mukozi wa Elicom, amenyesha ko bidatevye iryo shirahamwe rigiye gushira ku masoko twaba utumwanya tubora canke ibitekezo bikozwe mu bikarato bikomeye hisunzwe urugezo rw’utumwanya twahora dukenerwa na yo igiciro c’igitekezo ngo kizohindagurika bivanye n’ubunini bwaco. Elicom igasaba reta ko yoyishigikira mu kubakurako ikori gutyo yinjize ibikoresho vyoroshe.

Tubajije mu bushikiranganji bw’uburimyi, ubworozi n’ibidukikije, umuyobozi Jérémie Nkinahatemba agira ati: « Rindire, hari ikiganiro kigiye kuremeshwa aho muzomenyeshwa vyose».

Tubibutse ko umukuru w’igihugu yasohoye itegeko no 100/099 kuwa 8 myandagaro 2018 ribuza kwinjiza, gukora, gukoresha no kudandaza utumwanya. Abadandaza bakaba bari bahawe amezi 18  kugira babe basohoye utumwanya twose turi mu bubiko.