Rihagarikiwe na Unicef, ishirahamwe «Foi en Action» riramaze gufasha abana barenga 4000

Mu mezi icenda aheze, igitigiri c’abana bafashwa n’ishirahamwe Foi en action carongerekanye: bavuye ku 2070 bashika 4518. Ingo zahawe inyigisho zitandukanye na zo ziva ku 1300 zija ku 4360, ikibano c’izo ngo kigizwe n’imiryango 13716 kirahimirizwa, na yo abashika 70 bahabwa inyigisho zo gusubiza hamwe abatase. Ni muri Bujumbura Mairie na Rural.

Vyashikirijwe na Acqueline Nshimirimana aserukira agateka k’abana mw’ishrahamwe Foi en Action (FA) aho ryari riramutse ryerekana, kuri uwu wa 24 Nzero, ibikorwa ryashoboye kurangura mu mezi 9 aheze mu gice ca kabiri c’umugambi waryo : Sangwa Ibibondo.

Sangwa Ibibondo …

 Nk’uko Acqueline abimenyesha, uwo mugambi  w’ishirahamwe Foi en Action, ugira uti « akira ibibondo vyisange mu muruyango ». Watanguranye ihangiro ryo gukura abana mw’ibarabara ubasubiza mu miryango bavamwo.

Hamwe n’ivyo,  ishirahamwe FA ryahisemwo gukorera no mu miryango abo bana bavamwo ndetse no mu kibano kugira ngo baronswe ubumenyi  bw’ukuntu bofata abo bana kuko hari aho usanga bafise ibikomere ku mitima. Kubw’ivyo inyigisho z’indero kivyeyi, ngo zaratanzwe.

Nk’uko bibandanya bishikirizwa, ngo benshi mu bana bafashijwe wasanga ari abahevye amashure. Kuri abo rero  ngo haraba ukubumviriza bagasubizwa mu mashure, abatari bafise ibikoresho vy’ishure barabironswa…

Ngo hari n’abana baba bafise ihahamuka. Abo barabumviriza bakabafasha vyaba bibarengeye  bakabarungika mu bindi bigo bishobora kubakurikirana, ari nk’abakorewe amabi eka n’abakeneye ubutungane bakabaherekeza …

Tuyage ivy’agateka k’abana tubicishije mu bicapo

Foi en Action  mu ngo n’imiryango ?

Rimaze kumenya ko ubukene buri mu bituma bikuru abana baja mumabarabara, iryo shirahamwe ryihaye intumbero yo kwigisha ingo n’imiryango ingene bokora udukorwa two kwiteza imbere bahereye ku mitahe mitomito nyene bafise kandi ngo ivyamwa ni vyiza cane.

Jeanine Kankindi, umukenyezi aba ku Buterere, akaba n’umwe mu baronkejwe izo nyigisho yemeza ko abana biwe uko ari 4 bahora birirwa gusegerereza, na we ari gukora ikiyedi ahereza isima umugabo wiwe. Munyuma umugabo wiwe ahava arwara mu mutwe.

 Ngo nta mwana n’umwe wa Candide yari aciga ico gihe, ariko inyuma y’inyigisho yahawe, ubu aradandagiza utu na turiya, mbere ngo ntacambara igitenge giteye ibiremo imbere n’inyuma,  arashaza  mu bandi akabwirwa ko yaberewe kandi n’abana akabambika bikaryoha.

Ngo ntakigotomesha  amazi abana ku nguvu ngo bahage bikunde baryame nk’uko yabikora mbere kuko ubu aronka utwo abaramiza kubw’inyigisho akesha Foi en Action. Ni nk’uko atagikubita abana nk’imamba kubw’inyigisho yahawe irora indero kivyeyi, nk’uko avyivugira.

Kuki igitigiri c’abana bari mw’ibarabara kitazwi gushika ubu?

Ignace Ntahombarira, umuyobozi w’igisata c’abana n’imiryango mu bushikiranganji bwo gushigikirana, amenyesha ko kitazwi ku mvo z’uko bari imigwi 3:« Hari abasanzwe bibera mw’ibarabara amasaha 24 kuri 24, abahirirwa ariko bataharara, baba bukoreshwe n’abababahaye indaro, n’abahakuriye ubu ari imisore n’inkumi. Kubw’ivyo, ngo n’iyo bagomvye gukora rusasuma rwabo, usanga bitoroha kuko bamwe usaga bavuye i Bujumbura bakaja za Gitega, Ngozi,… »

Abana batakarije vyangombwa vyabo mu mwuzurira bo ?

Gabriel Cimpaye ajejwe iterambere ry’ingo n’imiryango muri Mairie ya Bujumbura agira ati :« Ikibazo cabo kirazwi, babaye bari bariyandikishije, impapuro zabo bazozironswa ku buntu».

Mwomenya ko naho intambamyi zitabuze kuhaba nk’umwuzurira umaze igihe utera imiryango, Foi en action ifise n’amahangiro yo kwigisha abavyeyi gusoma n’ukwandika kugira ngo babashe kumenya ingene bazohora baharura ivy’urudandaza rwabo. Bagasaba gushigikirwa kugira ngo bashobore gushikira n’iyindi miryango myinshi.