Bimwe vyo kwicaranako, vyabindi vy’impuzu zitaburwa n’ivyuma… Baaaaayi!

Izi bisi zirerurira abantu 100 icarimwe. Buca zitangura guseha abiyunguruza kuva kuri uyu wa gatandatu, kw’igenekerezo ryo kuwa 20 mukakaro, nk’uko mu buyobozi bw’ishirahamwe Seviteb babimenyesha. Abo zizotwara ku ncuro ya mbere kuri uwo munsi, ngo ni imponjo ntibazoriha…

Iryavuzwe riratashe! Na none ngo iyo hataba ikibazo c’ukubura abashoferi banonosoye ivy’ukugendesha bene izo bisi, ngo ziba zatanguye gukora bugica. Yose hamwe ni imiduga 6, nk’uko Bernard Bigirimana, umuyobozi ajejwe ivy’ubutunzi muri iryo shirahamwe abimenyesha. Iyo miduga ngo ikaba ari iy’ishirahamwe Seviteb, risanzwe rikorera mu gisagara ca Bujumbura rikaba ridandaza imiduga, rikayikora ndetse rikanadandaza n’ivyuma vyayo.

Zimeze gute ?

Ziragutse, zifise imifarizo nk’imwe ya za ntebe bitirira abashikiranganji, harimwo n’imboneshakure, hakabamwo vya vyuma bitanga akayaga, zirahagurutse, ntawiyugururira canke ngo yugare, kireste shoferi atanze uruhusha. Bamwe bagomvye, bazogenda bihagarariye kuko hari imigozi hejuru yo kwifadikiza.

Mbega zizokorera mu gisagara cose ? Ibiciro vyo ni gute ?

Nk’uko Seviteb ibimenyesha, nya bisi zizofata amayira atatu, aja:

• Mirango: nya barabara ryahoze ryitiriwa « Uwa 28 munyonyo » ubu rikaba ryitirirwa « Mwezi Gisabo », uwuzoba avuye mu gisagara hagati canke atashe azoriha: 400 Fbu 
• Mu gisagara hagati > ku bitaro Kira > Campus Kinindo Université Lumière > Petit Séminaire > Kanyosha > Kajiji > Nyabugete: igiciro ni 400F
• Mu gisagara hagati > Lycée du Lac Tanganyika > Metalusa > Borabora > Kajaga > Pinacle > EPCM > Gatumba: 800F

Aho rero mu minsi iza ngo iryo shirahamwe Seviteb rizoshira ibiro aho mu gisagara hagati aho uwipfuza gutabuza itike yo ku munsi azohora ayitabuza akayibikako ayibonye ije akayerekana maze akayurira ata camira.
Ishirahamwe Seviteb rizonashira bene izo bisi ku migwa mikuru y’intara zo mu gihugu hagati, mbere zikanajabuka.

Kuba izo Bus zigiye gutangura gukora, ngo bigiye gutuma imyidodombo igabanuka, ukwanama ku mirongo bigabanuke eka mbere ngo umuntu aze aratamira agatsima kagishushe kuko ngo Cyriaque yahora ashika asanga kahoze kakamugora kurenza umuhogo ubona ko katanashushwa, ivyo bikamubabaza.

Weho wakiriye gute iyo nkuru ?