«Dukurire Hamwe», umugambi uje gufasha amashirahamwe gushikira abanyagihugu bisumbije mw’irangurwa ry’imigambi ya Leta

Rufashwe mu mugongo n’ibihugu vyunze ubumwe vya Buraya, urunani rw’amashirahamwe agizwe na Care International, REJA na Action Aid rwaratanguje kuva kw’igenekerezo rya 20 Ruhuhuma 2020 umugambi « Dukurire Hamwe » uje gufasha amashirahamwe adaharanira ivyicaro poritike kwongerereza intererano yahora ashira mu bijanye n’uburongozi n’iterambere ry’ubutunzi.

Uwo mugambi uzomara imyaka 3. Uzokorera ahanini mu bisata 6 ari vyo : ihindagurika ry’ibihe n’ibidukikije, indero, ugukingira no kugwanya amabi ashingiye ku gitsina, uburimyi n’ugufungura neza, amagara hamwe n’igisata kijanye n’akazi ku rwaruka no kwitunganiriza imigambi y’iterambere.

Ikindi kandi, uwo mugambi uzotuma amashirahamwe adaharanira ivyicaro vya poritike yitunganya bikwiye mu gushira mu ngiro imigambi ya Reta irangurirwa mu banyagihugu.

Uwo mugambi « Dukurire Hamwe » watangujwe n’urunani rw’amashiramwe Care International, REJA na Action Aid uje gufasha gushira mu ngiro ibiri mu gitabu c’integuro y’imigambi ya Reta PND 2018-2027 mu kigabane ca 13 kijanye no gutsimbataza uburongozi bwiza mu gukomeza imigenderanire ya Reta n’amashirahamwe adaharanira ivyicaro vya poritike.

Uruhara rw’ayo mashirahamwe ni nkenerwa

Amashirahamwe adaharanira ivyicaro vya poritike ntaboneka cane mw’itunganywa ry’ishirwa mu ngiro ry’imigambi ya Reta, kandi ayo mashirahamwe yabwirizwa guherekeza ibikorwa vya Reta mu gushikira  abenegihugu. 

Ni muri iyo ntumbero yo gushika kw’ihangiro bihaye, abaserukira amasirahamwe adaharanira ivyicaro vya poritike yo mu ntara zose z’Uburundi bakorera muri vya bisata 6 bakurikiranye inyigisho zo kubakarihiriza ubwenge mu bijanye n’ubuhinga bw’ingene bokora n’uko ayo mashirahamwe yo ubwayo yokwitunganya. Izo nyigisho zikaba zabaye kuva kuri uwu wa 5-8 Mukakaro hamwe no kuva ku wa 19-22 Mukakaro 2021 mu nyubakwa Tiger’s Hotel iri mu gisagara ca Bujumbura. 

« Dukurire Hamwe » igamije iki?

Chantal Kamariza wo mw’ishirahamwe ry’abakenyezi ryishinze guteza imbere indero ya ba ntahonikora (Association des Femmes pour l’Education des Démunis) avuga ko, biciye muri izo nyigisho yaronse yaratahuye ko amashirahamwe adaharanira ivyicaro vya portitike afise uruhara ntangere mw’ishirwa mu ngiro ry’imigambi ya Reta. Ku bwiwe, ngo amategeko amwe amwe yokurikizwa ukwari kugira hatuzwe burundu abubakana hataragera hamwe n’inda z’indaro kuko ivyo ari vyo bituma abana b’abigeme baheba amashure.

Jonas Nduwimana yaserukira ishirahamwe rya Ekleziya Katorika ryishinze gukingira ibidukikije mu Burundi  ACAPE (Association Catholique pour la Protection de l’Environnement au Burundi) agira ati : « Ubu ndatahura neza ico ari co ishirahamwe ridaharanira ivyicaro vya poritike. Ishirahamwe ryose ridaharanira ivyicaro vya poritike ryategerezwa gukorera abenegihugu uko rishoboye vyose kugira rishire mu ngiro amahangiro riba ryarishiriyeho kuva rigishingwa. »

Jonas Nduwimana arongoye uwo mugambi amenyesha ko intumbero y’izo nyigisho yari iyo kuronsa ubumenyi n’ubuhinga abaserukira amashirahamwe adaharanira ivyicaro vya poritike kugira azoshobore gushira mu ngiro imigambi ya Reta irangurirwa mu benegihugu.

Yose hamwe ni amashirahamwe 146  yari yaserukiwe muri izo nyigisho. Abari bitavye izonyigisho barahawe impapuro zemeza ko bazikurikiranye (Certificats) kandi amashirahamwe 6 yashoboye gutsindira ihiganwa ryatunganijwe ku buhinga bwa none biciye ku rubuga osc.care.org.bi yararonkejwe ubushimwe bugizwe n’amaterefone manini yo mu bwoko bwa « tablettes ».

Emmanuel Ntahongendera aserukira imbere y’amategeko ishirahamwe ryishinze kurwarya ubukene « Urumuri » ryo mu ntara ya Cankuzo, yarerekanye umunezero wo kuba yaronkejwe agashimwe mu gushimira abagize iciyumviro c’uwo mugambi hamwe n’urunani rw’amashirahamwe rwawushize mu ngiro. Agira ati : «  T ugiye kubandanya dushira mu ngiro ivyo twiyemeje mu guterera mw’iterambere ry’ikibano n’ubutunzi vy’igihugu cacu. »