Violette Mukagatare, uwanaguye amashirahamwe

Mu gihe ishirahamwe ryo kuziganya no kuguranana «Mukenyezi Iteze imbere» ryo ku musozi wa Ntega, ryari rizingamitswe n’amadeni atishurwa, Violette  Mukagatare yaribereye urukiza. Uwo nawe ni inde?

Ku butekereji n’amasoni vyiwe,ntawomuha ubutwari bwo gushira ku murongo amashirahamwe yo muri Ntega, igikorwa yashimiwe cane muri iyo komine. Abakenyezi bose bo mw’ishirahamwe «Mukenyezi Iteze imbere» baramuhurizako. Bagira bati :«Iyo atahaba, ukuziganya no kuguranana biba vyarahagaze, ntitukiba tugikora ibikorwa vy’ishirahamwe».

Violette Mukagatare rero, ni umwigishakazi wo mu mashuri y’isumbuye muri komine ya Ntega, akaba ari ijisho ry’ishirahamwe Dushirehamwe muri iyo komine. Naho asanzwe atari umwe mu bari muri uwo mugwi w’ukuziganya n’ukuguranana Mukenyezi Iteze Imbere, Violette yarafashije cane abasanzwe bayirimwo mu kubereka ukugene bokwifatira mu minwe ishiarahamwe bakiteza imbere. Violette avuga ati : «Kuva iyo migwi yo kuziganya no kuguranana isubiriye gukora neza, abakenyezi barashobora kwigurira agasabuni, igitenge, n’utundi twa nkenerwa, batarinze gusabiriza ku bashingantahe babo».

Mu gihe uwo mugwi Mukenyezi Iteze Imbere wari ufise imyaka ibiri gusa, Violette ashikiriza ko wahuye n’ibibazo bifatiye ku banywanyi bashaka gufata amadeni bagaca bareka kuyishura, bagahiga mbere n’ukwo bova mu murwi

Ku butwari n’ububangutsi bw’iwe , Violette yaragaruye intama zazimiye

Violette yigana ati :«Narahamagaye abo bakenyezi bose basa n’abahemutse ku co bari bemeye, ndabibutsa ihangiro ry’ishirahamwe, ndabumvisha ko bategerezwa kuriha amadeni basavye, ndabamenyesha ko ishirahamwe ridashobora guhomba bivuye kuri bo». Ico gikorwa caragize ico kimara. Nk’akarorero, umwe muri abo bakenyezi yarashoboye kuriha amafaranga y’amarundi agera kuri  28.700 yari aheranye.

Francine Nshimirimana, umunywanyi w’ishirahamwe Mukenyezi Iteze Imbere  aravyemeza. Agira ati : «Hari abakenyezi basavye amadeni munyuma ntibipfuze kuyariha. Niho Violette yaciye afata ibintu mu minwe, arashira ku murongo abo bari bataye ihangiro, ubu abatari bake bakaba bariko barishura ayo ma deni ».

Ku bwa Francine Nshimirimana, Mukantare yarasubije agateka umugwi w’abo wariko usa n’uwuhomba, akaba yabikoze mu butwari ntangere. Agira ati :«Kuva uwo mu hizi aje kudufasha, ntiturasubira guhura n’ibibazo vy’abadashaka kuriha amadeni yabo».

Florentine Nkunzimana, nawe kuva abaye umunywanyi w’iryo shirahamwe, ashikiriza ko kuva aho aherewe ideni yatanguje urudandazwa rutoyi rw’ibitoke n’udutomati, agashima cane ukwigenga kubijanye n’uburyo. Avuga ati :«Ni umunezero ntangere kubona Violette yaraje kudufasha. Nari nagize umutima uhagaze kubijanye n’iterambere ry’ishirahamwe. Iyo rihomba nari kuba mburiyemwo uburusho butari buke nkurayo».

Co kimwe na Francine, Florentine nawe nyene arashimagiza igikorwa Violette yakoreye ishirahamwe, mu gihe hari hasigaye ko ibibazo vy’abanywanyi batariha amadeni bishikanwa mu butungane.