Urwaruka rwo mw’ishirahamwe CPAJ rwaratahuye ko kwibeshaho bishoboka

Biciye mu gufashanya, ukuguranana hamwe No mu bikorwa rusangi, abanywanyi b’urunani rw’amashirahamwe yishinze guteza imbere urwaruka CPAJ rwo muri komine ya Ntega, bashaka kwitegurira kazoza kabo.

Urwaruka rwo muri Ntega ntirwigeze rurera amaboko ngo nuko rutaronse akazi rwigiye. Ahubwo rwagiye hamwe rwiteza imbere. Biciye mu bikorwa abanywanyi b’ishirahamwe CPAJ barangurira hamwe, bararonka uduhera duke duke tubafasha kwiziganiriza, nayo inyungu bakayigabana hagati yabo ndetse n’abatishoboye bagafashwa. Nadine Ndayisenga umunywanyi w’iryo shirahamwe agira ati : «Turamaze kugura impene », yongerako ati : « Nizavyara zikagwira, duteganya kwagura umugambi mu kuronsa imyagazi abandi banywanyi b’ishirahamwe».

Nkuko bimenyeshwa na Claudine, umunywanyi w’ishirahamwe CPAJ, agira ati :« Mu mafaranga y’ingurane nahawe mw’ishirahamwe, naciye ndayakoresha mu kurangura imikunga y’ibitoke, kuva muri aya mezi aheze ndashobora kwigurira ivyo nkeneye ». Bamwe mu banywanyi b’ishirahamwe  CPAJ baracari ku ntebe y’ishure. Nadine agira ati : « Abo banywanyi bakiri kw’ishure bafashwa n’ishirahawe. Hageze gutangura ishure , ishirahamwe ni ryo ribaha amakaye n’ibindi bikoresho vy’ishure vya nkenerwa».

Aha rero yongerako ati: «  Naho bimeze uko, nta yandi mikoro dufise atari uduhera dukura mu dukorwa dukora, ni naco gituma dusaba abagiraneza kutuba hafi no kudushigikira ».

CPAJ, mwizero wa kazoza keza 

Iryo shirahamwe rigizwe n’abanywanyi 20 riramaze gukora ibitari bike. Abanywanyi baririmwo barateye iteka komine Ntega. Audace aba ku Ntega, agira ati : « Ni urwaruka rw’akarorero mu kibano. Mpora ndarubona ruri mu bikorwa rusangi, uko rushigikirana n’ingene rufashanya biraboneka ko kazoza karwo ari keza ». Si we gusa n’umwe mu bavyeyi barereye mw’iryo shirahamwe agira ati : «Umukobwa wanje yari yahebeshejwe ishure n’indwara. Yararonse ingurane mw’iryo shirahamwe CPAJ aca adandaza imboga n’ivyamwa, ubu aradusahiriza mu muryango ».

Mu kurindira  ko batangura iyindi myuga nko kujisha intaro hamwe no kujisha ibiseke n’inkoko, abanywanyi b’ishirahamwe CPAJ basaba gushigikirwa n’abanyamitahe.