Umurundi yamye apfana isoni

Mu gihugu hagati wumva bavuga ko « bose bumvise uyu canke uriya, umugenzi w’umugenzi, gisanira, umubanyi »… Ku bisigaye bose ni nwe !

Kw’ishure ryisumbuye rya Kayanza (lycée), twahashitse ivyigwa birangiye. Abanyeshure bariko baja mu buraro, mugabo batihuta.

Bamwe barashimye kwiganirira n’abo babonye bavuye i Bujumbura ari bo twebwe.Tweho rero twaciye tududurirako. Tubaza duti :
« Muramaze kwumva ibijanye no kwideribera ngaha ? » Agacere ngo nwe! Brian, umuhungu yiga mu w’icumi na kabiri ati : « Uvuze 
uti ? » Beguwe n’agatwengo
 bose. Aca aratubwira ko ivyo bitabaho na ho nyene wamengo arinanase yubahurwa n’uko babanje gutwenga.Iryo shure ntitwiyadukije kuritora. Abasanzwe baritazira « Ntahondereye », bikumvikana ko abiga ngaho atari abamarayika.Iryo shure rifise uburaro bw’abahungu n’abigeme, biravugwa ko rimwe na rimwe mu mwanya wo gusubiramwo ivyigwa vyabo, abahungu n’abakobwa bamwebamwe baba bari mu bindi, ku buryo iyo umwaka urangiye hari abakobwa bataha bafise igicuro mu nda (bibungenze).

Ridwina, umunyeshure waho afise imyaka 16 ararahira ati : « Aho hari kera »Ivyo rero birashimangirwa na Yuvinari Mbonihankuye, umuyobozi w’ishure amenyesha ko ivyo vyoba vyarabaye mu bihe vyashize, mugabo ubu ngo ata n’umwe barapfa bumvise yoba yakoze iryo shano.

« Biriho naho bitavugwa »

« Nemeye gusubiramwo umwaka wa mbere muri kaminuza mu gisata c’ubuvuzi kubera ko nankiye umwigisha ko turyamana. » Bivugwa n’umunyeshure yiga muri kaminuza imwe iri mu buraruko bw’igihugu.Nya mwigisha ngo yari azwi n’ubuyobozi n’abigisha ko umenya iwe muri ubwo buryo buhumanye mugabo ngo ubuyobozi bwa kaminuza ntibamukakaza.

I Gitega, mw’ishure rimwe ry’abigenga, abanyeshure bamenyesha ko naho izo ngeso zitabuze bigoye kudomako urutoke kuko ngo babigirira mu mpisho. « Igitangaje gikomeye ni iyo igihe umunyeshure ubona mw’ishure ata co ahanoba ukaja ubona abaye mu ba mbere mu mpera z’umwaka. »

Kuva mu bumanuko gushika
 mu buraruko uciye mu ntara
zo hagati, uwo mugirwa uriho, mugabo birahishwa bagakubura agahishamwanda bakavuga ko iwabo vyera ngo de ! « Iwacu iyo ngeso ntayiriho », kubera ko ata kivyemeza bafise. Aha rero umwaka w’ishure ugira urangire, no « kwideribera » bibone kwaduka.