{"id":3754,"date":"2019-08-14T09:05:39","date_gmt":"2019-08-14T07:05:39","guid":{"rendered":"https:\/\/www.jimbere.org\/amayagwa\/?p=3754"},"modified":"2019-08-14T12:34:46","modified_gmt":"2019-08-14T10:34:46","slug":"burundi-amazuru-igitabu-christine-ntahe-ruyigi","status":"publish","type":"post","link":"https:\/\/www.jimberemag.org\/amayagwa\/burundi-amazuru-igitabu-christine-ntahe-ruyigi\/","title":{"rendered":"\u00ab\u00a0Ntidusubire gupfa amazuru kuko izuru, ryaba irifyase canke irisongoye hajemwo igicurane, yose avamwo ibiseru\u00a0\u00bb"},"content":{"rendered":"\n

Kw\u2019igenekerezo rya 9 Mukakaro 2019, \u00ab\u00a0Abakenyezi b\u2019intwari bibagiwe\u00a0\u00bb<\/a> bari bishikiye mu ntara ya Ruyigi. Abato n\u2019abakuze bose biyemeje guharanira amahoro bahereye aho babaye.\u00a0Abitavye bose n\u2019abarengana bari bafise inyota yo gufata ijambo.<\/strong><\/p>\n\n\n\n

\u00ab\u00a0Ntidusubire gupfa amazuru kuko izuru, ryaba irifyase canke irisongoye hajemwo igicurane, yose avamwo ibiseru.\u00a0\u00bb<\/em> Ako ni akamo katewe na An\u00e9sie Nkumbuye, umupfasoni w\u2019umwirimizi wo mu Ruyigi. Atarya umunwa, yariko aratera akamo abari bagandagaje ku murwa mukuru wa Ruyigi baje kwiyumvira intahe zishingwa n\u2019abakenyezi Eug\u00e9nie Bancako na Zenayidi Nagashira. Basanzwe banditswe mu gitabo \u00ab\u00a0Abakenyezi b\u2019intwari bibagiwe.\u00a0\u00bb<\/p>\n\n\n\n

Mu\nkibanza kirimwo agatutu gikikijwe n\u2019ibiti vy\u2019imikoho, ku murwa\nmukuru wa Ruyigi, hari hagandagaje abagore, abagabo n\u2019urwaruka.\nAbandi na bo barwiriyemwo abakiri bato, bari bahagaze irya n\u2019ino\ny\u2019ico kibanza mu mabarabara. Hari ababa bariko barirenganira bagaca\nbahagarara kugira ngo bumve ibivugirwa aho hantu hagumye hasamirana\nindirimbo zitandukanye bongera bumva akamo kabatumirira kuza\nkwiyumvira intahe zishingwa.<\/p>\n\n\n\n

Hari n\u2019abavuga ko baje kugira bibonere umupfasoni Christine Ntahe bahora bumva ku nsamirizi kera bakaba batakimwumva. Warabona ko umwe wese afise inyota yo kuza kwibonera ibihavugirwa. Abari mu miduga barengana hari abahagarara bamwe bakamara akanya bateze amatwi. <\/p>\n\n\n\n

Umwe mu bahagaze bariko bararengana ati: \u201cBurya abantu batobato nkabo ivyo bakora usanga bitamenyekana kandi ababanyi babo bategerezwa kubisunga. Ni ukuri ndahimbawe. Nta kiryoshe nk\u2019ukubona abantu b\u2019abirimizi bahawe ijambo gutyo. Ivyo bashitseko abavyanditse barakoze kuko abantu bumva ivyakozwe n\u2019abize kandi ahanini harimwo abironderera ibiti gusa.\u201d<\/em><\/p>\n\n\n\n

\"\"
Umwe mu bitavye ikiganiro ariko arasoma igitabu<\/strong> <\/figcaption><\/figure>\n\n\n\n

\u201cArusha\nyatanguriye mu bakenyezi batobato\u201d<\/strong><\/p>\n\n\n\n

Christine Ntahe, amaze kumenyesha igituma yanditse ico gitabo n\u2019ingene yahuye n\u2019abo bapfasoni yanditseko yaciye aha ijambo bamwe babiri bagendanye na we. Eug\u00e9nie Bancako wo muri komine ya Buhiga mu ntara ya Karusi ni we yatanguye gufata ijambo. Yabaciriye ku mayange ivyo yabayemwo vyegeranijwe mu ntahe ziri muri nya gitabo. Nk\u2019uko vyagenze no ku bandi, na we nyene ngo kwasa n\u2019ukwiroha, kuko yagiye mu mitumba kurondera Abahutukazi bahoze bibaniye neza atarahunga. Nya mututsikazi ngo vyaramuhanze mugabo ahava arabishikako. <\/p>\n\n\n\n

Musitanteri\nngo yarabahaye aho barima hanini cane, umukuru w\u2019ikambi\ny\u2019abateshejwe izabo na we amwemerera ko Abahutukazi bazoza\natawuzobarya n\u2019urwara. Ngo baciye bakorera hamwe mw\u2019ishirahamwe\nryitwa \u201cHabe Amahoro\u201d. Ryari rihurikiyemwo Abahutukazi,\nAbatutsikazi n\u2019Abatwakazi. \n<\/p>\n\n\n\n

Mu nyuma ngo ni ho Christine Ntahe yabashikira, akorera ishirahamwe Search For Common Ground, ahava abaha amaradiyo. Ivyo ngo vyarabafashije kuza barumviririza hamwe ayavugwa mu gihugu, no mu kunywana kuko ngo baja hamwe ari ubwoko bwose. <\/p>\n\n\n\n

Bancako ati: \u201cArusha yagiye kuza abakenyezi batobato bayitanguye kera.\u201d <\/em>Kira noneho wewe ngo yahavuye anatumirwa mu biganiro vyashitse ku masezerano y\u2019i Arusha.<\/p>\n\n\n\n

Amaze\ngufata ijambo, Umutwakazi Zenayidi Nagashira yamenyesheje ayo yagowe\nkubera urwimo rwo mu 1993. Yababwiye ukuntu yahunga n\u2019imbanyi kandi\nahetse. Ati:\n\u201cTwari dutunzwe n\u2019ukubumba mugabo ivyo bikono ntitwaronka\nuwubitugurira. Twagira turahagurutse tukumva aha canke hariya\nbararashe tukabita hasi tugahungira mw\u2019ishamba.\u201d<\/em><\/p>\n\n\n\n

Kubera ico kiza, ngo yabuze abana batanu kubera inzara n\u2019indwara. Ubu hoho ngo aho amaze gushikira muri \u00ab\u00a0Habe Amahoro\u00a0\u00bb, ararya akaryama kandi n\u2019abana biwe bari mw\u2019ishure. <\/p>\n\n\n\n

Yaciye atumirira abari ngaho kubumbatira amahoro, anasaba abakenyezi ko bokwitaba amatora buca aba mugabo batadohoka mu guharanira amahoro. <\/p>\n\n\n\n

\"\"
Umutwakazi Zenayidi Nagashira ariko arigana ayo yagowe kubera urwimo rwo mu 1993: \u201cTwari dutunzwe n\u2019ukubumba mugabo ivyo bikono ntitwaronka uwubitugurira. Twagira turahagurutse tukumva aha canke hariya bararashe tukabita hasi tugahungira mw\u2019ishamba\u201d<\/strong><\/em><\/figcaption><\/figure>\n\n\n\n

Amahoro\nimbere ya vyose<\/strong><\/p>\n\n\n\n

Abenshi mu bari ngaho baguma batanguranwa kwaka ijambo, kugira ngo bagire ico bashikirije ku vyo bari bahejeje kwiyumvira. Eka mbere hari n\u2019abaca bavuga ico biyemeje bagiye gukora. <\/p>\n\n\n\n

G\u00e9n\u00e9rose Inabutama ati: \u201cIco nkuyemwo ni uko mbonye ibintu bimeze nabi, nzokwitanga kugira ngo bigende neza. Ubu twimirije amatora, hazoza ibihuha vyinshi mugabo tugume dufatanye mu nda n\u2019umutima ukeye.\u201d<\/em><\/p>\n\n\n\n

Ivyo\nabo bakenyezi b\u2019intwari bashitseko ngo ntibisanzwe, kuko ngo ngo\nhari abipfuje, kubikora aho babaye mugabo bikabankira. Siriniya\nNahishakiye, asanzwe ari mu bakanguruiramahoro, ati:\n\u201cKirya gihe c\u2019indyane vyari bigoye. Na twebwe ngaha iwacu\ntwarabibona, umutima ugakubita, mugabo amaboko agasha.\u201d<\/em><\/p>\n\n\n\n

Yaciye\namenyesha ko agiye guhimiriza abandi bakenyezi, kugira ngo bazibire\nakabi n\u2019akabibi kataraduka. Yemeza ko umugabo ata kibi yokora\numugore ariko aramira, eka mbere n\u2019abana ni ko kw\u2019uko, kuko ngo\nni we abana na bo hagufi. \n<\/p>\n\n\n\n

Mu\nkwerekana ko amacakubiri yamushishe, uwundi mupfasoni yitwa An\u00e9sie\nNkumbuye yamenyesheje ko ata gupfa ivy\u2019amazuru, kuko ngo nakare\n\u201ciyo haje igicurane, amazuru afyase canke ayasongoye, yose avamwo\nibiseru.\u201d<\/p>\n\n\n\n

N\u2019abagabo bariyemeje kubumbatira amahoro. Umusore Nestor Nzambimana yiyemeje kurandurana n\u2019imizi ibijanye n\u2019ubwoko. Ngo azofasha urundi rwaruka, maze bakorere hamwe mu ntumbero yo kubumbatira amahoro.<\/p>\n\n\n\n

Abatari bake bamaze gufata ijambo, Christine Ntahe yabasavye na we nyene kuyaga n\u2019abana babo co kimwe n\u2019abagabo babo. Yababariye ko kazoza keza katava mu ruhagarara.<\/p>\n\n\n\n

Ikiyago carangijwe n\u2019uguha udushimwe abafashe ijambo. Twari tugizwe n\u2019ibitenge, imipira, ibikoresho vy\u2019ishure n\u2019ibindi. Abatari bake na bo bakaba bararonse ibitabo. Eka mbere bahavuye baca batambira hamwe bose.<\/p>\n\n\n\n

\n